Нийслэл хотод цас орсонтой холбоотой халтиргаа, гулгааны эрсдэлийг бууруулах арга хэмжээ авч, 600 гаруй ажилтан албан хаагч ажиллаж байна.

НЗДТГ-ын мэдээлснээр, Сүхбаатар дүүргийн зам талбайн цэвэрлэгээг дөрвөн байгууллагын, 145 ажилтан албан хаагч хийж байна. Гудамж талбайн цэвэрлэгээнд тусгай бодис цацагч техник дөрөв, авто зам болон замын нуух шүүрдэгч техник дөрөв, ковш хоёр, бобкат зэрэг төхөөрөмжийг ашиглаж байна. Дүүргийн хэмжээнд 624 тонн давс, 654.7 тонн бодисын нөөцтэй байгаа аж.

Мөн Хан-Уул дүүргийн нийтийн эзэмшлийн зам талбайн цэвэрлэгээ үйлчилгээний 14 байгууллагын 280 ажилтан нуухны машин, давс, бодисын машин зэрэг 41 машин техник, 75 бичил төхөөрөмжтэй ажиллаж байна. Авто замын халтиргаа гулгаанаас сэргийлэн 20 тонн давс, 70.5 тонн бодис цацаад байна. Морингийн даваа, Айцын даваа, гүүрнүүдэд давс, бодис цацах ажил үргэлжилж байна. Дүүргийн хэмжээнд 1259 тонн давс, 717.5 тонн бодисын үлдэгдэлтэй байгаа юм.

Сонгинохайрхан дүүрэгт халтиргаа, гулгаа үүсэхээс урьдчилан сэргийлж, 61 тонн давс, 49 тонн бодис, 20 тонн дайрга цацаад байна. Аргүнтийн даваа, Баруун турууны давааны зорчих хөдөлгөөн хэвийн, Найрамдал, Баруун, Зүүнсалааны зуслангийн бүсээр цас шуурсан байдалтай, төвийн болон Баянхошуу, Толгойтын гэр хорооллын замд давс бодис цацсан, зорчих хэсгийн хөдөлгөөн хэвийн байна.

Баянгол дүүргийн нийтийн эзэмшлийн 62 гудамж, 846. 420 м.кв зам талбайг найман байгууллагын 178 ажилтан 18 машин техник, 50 бичил төхөөрөмжтэй цэвэрлэж байна. Авто зам дээр халтиргаа гулгаа үүсэхээс урьдчилан сэргийлж, 9.5 тонн давс, 32.5 тонн бодис цацаад байна. Дүүргийн хэмжээнд 313.5 тонн бодис, 532.5 тонн давсны үлдэгдэлтэй байгаа аж.