Хиймэл оюунд суурилсан ухаалаг камераар замын хөдөлгөөний зөрчил илрүүлж, торгууль ногдуулах зохицуулалтыг 2026 оны нэгдүгээр сарын 1-ний өдрөөс хэрэгжүүлж байна.

Тэгвэл 2026 оны эхний дөрвөн өдөрт 4000 орчим жолооч хиймэл оюун буюу AI камерын илрүүлэлтээр торгуулжээ. Үүнээс гадна “шалгагдаж байна” гэх төлөвийг иргэд торгуультай андуурч бухимдах тохиолдол нийтлэг гарч байгааг албаныхан хэлж байна.

Тухайн иргэн, хуулийн этгээд нь эрх бүхий албан тушаалтны шийтгэлийн хуудсыг эс зөвшөөрвөл шийтгэл оногдуулснаас хойш ажлын тав хоногийн дотор Дүүргийн Эрүү, Иргэний хэргийн хялбар ажиллагааны анхан шатны тойргийн шүүхэд гомдол гаргах эрхтэй аж. Иргэн, хуулийн этгээд гаргасан нэхэмжлэл нь аль шүүгчид хуваарилагдсан болон холбогдох шүүгчийн туслахын утсыг https://scp-court.mn/ сайтад хандан өөрийн нэрийг бичин хайж мэдэх боломжтой юм байна. Замын хөдөлгөөний удирдлагын төвийн дарга Ч.Хувьзаяагийн хэлснээр AI системд бүрэн шилжсэнээр жолооч нарыг хуйгаар нь торгоно гэсэн үг биш. Харин Замын хөдөлгөөний зохицуулалтыг технологийн дэвшилд бүрэн оруулж буй хэлбэр аж.

Иргэд цагдаагийн зохицуулалтаар, түргэн болон галын машин зам тавьж өгснийхөө төлөө торгуулж байгаа талаар гомдол мэдүүлдэг. Тэгвэл ЗХУТ-ийн мэдээлснээр одоогоор ийм тохиолдол гараагүй бөгөөд шууд торгохгүй, нягталсны үндсэн дээр торгож байгаа юм байна.

Ташрамд дурдахад, Улаанбаатар хотын 176 уулзвар, гарц замд 2600 гаруй камерыг шинээр суурилуулж, замын хөдөлгөөнийг AI буюу хиймэл оюун ашиглан бүрэн хянаж эхэлсэн бөгөөд камераар 10 төрлийн зөрчил илрүүлж байгаа юм.