“Багийн эмчийг унаажуулах” хөтөлбөрийн хүрээнд энэ онд аймгийн долоон сумын долоон багийн эмчийг Япон Улсын Тоёта Пробокс маркийн автомашинаар хангаж, уг автомашинуудыг УИХ-ын гишүүн О.Цогтгэрэл, Б.Бейсен аймгийн Засаг дарга Е.Зангар нар эмч нарт гардууллаа.

Багийн эмч нар нь өвөл зун, цас зуд, бороо шавартай, цаг агаарын ямар ч хүнд нөхцөлд малчид, тариаланчдад эрүүл мэндийн анхан шатны тусламж, үйлчилгээг хүргэдэг нэн чухал үүрэгтэй төрийн алба хаагчид билээ.

Баруун бүс нутагт өвөлжилт жил бүр хүндэрч, малчид отор нүүдэл хийж өөр аймаг, сумын нутагт өвөлжих нь элбэг байдаг. Ийм нөхцөлд багийн эмчийн ажил нь суурин байхаас илүүтэй иргэдийнхээ араас явж, эрүүл мэндийн үйлчилгээ, эмчилгээ, хяналт тандалтыг газар дээр нь хүргэх шаардлага нэмэгдэж байна. Энэхүү хэрэгцээ шаардлагыг харгалзан тус аймаг 2021 оноос эхлэн хөдөөгийн багийн эмч нарыг автомашинжуулах ажлыг үе шаттайгаар хэрэгжүүлж эхэлсэн билээ.

Дээрх хөтөлбөрийн хүрээнд энэ удаа Баян-Өлгий аймгийн Толбо сумын 1 дүгээр багийн эмч Л.Балторгай, Дэлүүн сумын 7 дугаар багийн эмч О.Хурметбек, Алтай сумын 2 дугаар багийн эмч Т.Туяа, Цагааннуур тосгоны эмч Т.Баглан, Ногооннуур сумын 3 дугаар багийн эмч К.Салемгул, Өлгий сумын “Мейрим” өрхийн эмнэлгийн эмч К.Еркегүл, Баяннуур сумын 3 дугаар багийн эмч З.Саулетхан зэрэг баг, өрхийн эмч нарт автомашин гардууллаа.