Сонгинохайрхан дүүргийн 42 дугаар хороонд 240 ортой цэцэрлэгийн барилгын ажил дуусаж, улсын комисс хүлээн авлаа.
Тус цэцэрлэгийн барилга нь зоорьтой хоёр давхар, 47.7х21х2 метр хэмжээтэй, нийт 2500 м.кв талбай бүхий барилга юм.
Цэцэрлэгийн анги, бүлгийн өрөөнүүд, багш нарын өрөө, хувцас солих өрөө, гал тогоо, ариун цэврийн өрөө болон бусад өрөө тасалгааг барьж, улсын төсвийн хөрөнгө оруулалтаар ажлыг гүйцэтгэлээ.
Мөн гадна тохижилтын хүрээнд хүүхдийн тоглоомын талбай, явган хүний зам, гадна гэрэлтүүлэг, авто зогсоол, биеийн тамирын талбай, ногоон байгууламж хийж гүйцэтгэв.
Тус бүтээн байгуулалтыг "Эй Ди Констракшн ХХК" гүйцэтгэж, нийслэлийн Хөрөнгө оруулалтын газар захиалагчийн техник хяналтыг хэрэгжүүлэн ажиллалаа.
