НҮБ-ын Дүрвэгсдийн асуудал эрхэлсэн дээд комиссарын газар (UNHCR) болон Өмнөд Суданд энхийг сахиулах ажиллагаанд оролцож буй Монгол Улсын Зэвсэгт хүчний XV ээлжийн цэргийн баг хамтран дайнаас дүрвэсэн дүрвэгчдийг шилжүүлэн байрлуулжээ.
Тодруулбал, Суданаас хил даван орж ирсэн дүрвэгсдийг тус улсын Ротриак суурингаас Памир дүрвэгсдийн хуаран руу шилжүүлэн байрлуулах ажиллагааг зохион байгуулсан байна. Энэ үеэр нийт 267 дүрвэгч шилжүүлсэн бөгөөд үүнээс 149 нь 18 хүртэлх насны хүүхэд байв.
Суданд тус улсын Засгийн газрын Зэвсэгт хүчин ба Түргэн байрлах хүчин нэртэй парамилитари бүлэг хоорондох иргэний дайн 2023 оны дөрөвдүгээр сараас эхлэн өнөөг хүртэл үргэлжилсээр... Тус дайнаас үүдэж Өмнөд Суданруу нийт 970 мянга гаруй хүн хил давсан гэх тооцоо гарчээ. НҮБ болон олон улсын зарим байгууллагаас хүмүүнлэгийн тусламж хүргэх үйл ажиллагааг шат дараатай зохион байгуулж байгаа аж.
