Улаанбаатар хотын хөгжлийн мега төслүүдийн хүрээнд “Тархмал эх үүсвэр” төслийг 10 байршилд хэрэгжүүлнэ.

НЗДТГ-ын мэдээлснээр Их Засаг, Дүнжингарав, Цэцэрлэгт хүрээлэн, Дэнжийн мянгад хийн түлшээр ажиллах дулааны станцуудыг барих юм. Сэлбэ болон Хүннү хотод байгальд ээлтэй технологи нэвтрүүлж, газрын гүний дулаан ашиглах геотермийн станц барина. Харин Шархад, Яармаг, Залуус, Морингийн давааны бүсэд хатуу түлшээр ажиллах станцууд барихаар төлөвлөжээ.

Эдгээр эх үүсвэр нь 21-144 МВт хүртэлх хүчин чадалтай. Оргил цагийн үед системийн ачааллыг багасган, нийт 581 Гкал/цаг дулааны эрчим хүч нийлүүлнэ. Ингэснээр гэр хорооллын 43 мянган өрхийг дулаанаар хангах боломжтой бөгөөд Засгийн газрын тогтоолоор “Улаанбаатар түншлэл төв” ХХК байгуулж, төр, хувийн хэвшлийн түншлэлээр дээрх төслийг хэрэгжүүлэх ажээ.