Сэлэнгэ аймгийн Цагааннуур сумын хүүхдийн цэцэрлэгийн үйл ажиллагаа улсдаа жишээ болохуйц сайн туршлагаар шалгарсан байна.

Тус цэцэрлэгийн хамт олон сургалтын орчны стандартын хэрэгжилтэд өөрийн үнэлгээ хийж, засан сайжруулах шаардлагатай асуудлаа илрүүлэн төлөвлөгөөндөө тусган хэрэгжүүлж ажилласнаар хүүхдэд ээлтэй, эрүүл, аюулгүй орчныг бүрдүүлж чадсан байна.

Тодруулбал хүүхдийн нас, хөгжлийн онцлог, хэрэгцээ сонирхолд нийцсэн, тэгш хүртээмжтэй үйлийн орчин бүрдүүлэхэд нэн түрүүнд анхаарчээ.

Мөн гадна тоглоомын талбай, туршлагын талбай, бүлгийн өрөөг стандартын дагуу дахин төлөвлөсөн байна. Түүнчлэн СӨБ-ын сургалтын хөтөлбөрийн суралцахуйн үр дүнтэй уялдуулан зохион байгуулж, тэгш хүртээмжтэй, үйлийн орчин бүрдүүлэхэд анхаарч, хүүхдийн сурч хөгжих боломжийг нэмэгдүүлжээ.

Бүлэг бүрийн сургалтын орчинд төлөвлөлт, зохион байгуулалт хийж, хичээлийн жилийн эхэнд бүлгийн орчны зураглал гаргасан байна. Ингэснээр хүүхэд бүрийн хөгжлийн хэрэгцээг хангасан, суралцахуйн үр дүнд нийцсэн суралцахуйн төвүүдийг бий болгож чадсан байна.

Энэ нь хүүхдийн бие даан тоглонгоо суралцах, багаар хамтран үйлдэх боломжийг нэмэгдүүлсэн төдийгүй багшлахуйн арга зүйг үр дүнтэй хэрэгжүүлэх орчныг бүрдүүлэхэд ихээхэн үр дүнгээ өгчээ.