БНХАУ-ын Төрийн зөвлөлөөс албан ёсоор баталсан, өөрийн гэсэн брэндтэй анхны олон улсын аялал жуулчлалын "China International Travel Mart-2025" үзэсгэлэн нээлтээ хийлээ.

Ази тив дэх хамгийн том мэргэжлийн гэгдэх 2001 оноос хойш жил бүр зохион байгуулдаг энэхүү  "CITM" үзэсгэлэн Хятадын Хайкоу хотод болж байгаа юм. 25 дахь удаагийн үзэсгэлэнд Хятадын 31 муж, хот, өөртөө засах орон, Хонконг, Макао, Тайвань болон дэлхийн 100 гаруй улс орон, бүс нутгаас аялал жуулчлалын байгууллага, тур оператор, зочид буудал, агаарын тээврийн компани, соёлын байгууллага, музей болон соёл, аялал жуулчлалын салбарынхан чуулдгаараа онцлогтой.

Тус үзэсгэлэнд манай улсаас “Нью жуулчин турс”, “Алтан говь тур”, “Цагаан лавай”, “Хишиг тур” тэргүүтэй найман аж ахуйн нэгж оролцож “Дөрвөн улирлын аялал жуулчлал”-аа онцлон танилцуулж байна.

Үзэсгэлэнгийн хүрээнд Монгол Улсын дөрвөн улирлын аялал жуулчлал, үндэсний өв соёл, байгалийн дахин давтагдашгүй тогтцыг олон улсад сурталчилж буй юм.

Энэ жил “Nihao-China” уриан дор зохион байгуулж буй тус үзэсгэлэн дотоодын соёл, аялал жуулчлал, технологи, соёлын бүтээлч, музей, гадаад жуулчлалыг дэмжих, аялал жуулчлалын үйлчилгээ, туршлага, олон улсын соёл, аялал жуулчлал гэсэн бүсчлэлээр болж байна. Мөн гадаад жуулчлалын бодлогын танилцуулга, бизнес уулзалт, хэлэлцээр зэрэг мэргэжлийн арга хэмжээг зохион байгуулж, гадаад жуулчлалыг хөнгөвчлөх бодлого, шинэ бүтээгдэхүүн, маршрут, бүс нутгийн хамтын ажиллагаа, аялал жуулчлалын маркетингийг онцлон танилцуулах ажээ.

Ташрамд дурдахад, өнөөдрийн байдлаар БНХАУ-аас Монгол Улсад 200 мянга гаруй жуулчин ирсэн нь бусад орны жуулчдын тоог тэргүүлж байна. Иймд манай орон олон улсын зах зээлд жилийн дөрвөн улиралд аялах боломжтой гэдгээ тодотгон харуулж байгаа юм.