БОУАӨ-ийн сайд Б.Батбаатар, НҮБ-ын Хөгжлийн хөтөлбөрийн суурин төлөөлөгч Матилда Димовска нар “Төрийн байгууллага дахь жендэрийн эрх тэгш байдлын гэрчилгээжилт хөтөлбөр”-ийн төслийн баримт бичигт гарын үсэг зурлаа.
Хөтөлбөрийг ECCOFARM болон Жендэрийн үндэсний хороотой хамтран хэрэгжүүлэх бөгөөд байгууллагын жендэрийн тэгш байдлын бодлого, үйл ажиллагааг үр дүнтэй, тогтвортой хэрэгжүүлэх, олон улсын жендэрийн стандартад нийцүүлэх суурийг бүрдүүлнэ. 2027 оны 12 дугаар сар хүртэл хэрэгжүүлэх тус хөтөлбөр жендэрийн бодлогын хэрэгжилтийг бэхжүүлэхээс гадна уур амьсгалын өөрчлөлтийн эсрэг дасан зохицох, тогтвортой хөгжлийн зорилтыг хэрэгжүүлэхэд ач холбогдолтой юм. Жендэрийн тэгш байдлыг төрийн бодлого, үйлчилгээнд нэвтрүүлэх нь хүний эрхийн суурь зарчимтай нийцэж, нийгмийн шударга ёсыг бэхжүүлэх чухал алхам гэдгийг БОУАӨЯ мэдээлэв.
Уур амьсгалын өөрчлөлтийн эрсдэлд эмэгтэйчүүд илүү өртөмтгий байдаг тул дасан зохицох бодлогыг жендэрийн мэдрэмжтэй боловсруулах нь үр дүнтэй. Эмэгтэйчүүдийн оролцоог хангах нь байгаль хамгааллын шийдвэр гаргах, нөөцийн зохистой ашиглалтад бодит хувь нэмэр болно.
