2025 оны татварын орлогын төлөвлөгөө, түүний гүйцэтгэл болон татварын өр хураах ажиллагааны явцын талаар Татварын ерөнхий газрын дарга Б.Цогтнаран өнөөдөр мэдээлэл өглөө.

Тус алба 2025 онд улсын төсөвт нийт 17.9 их наяд төгрөгийн орлого төвлөрүүлэхээр төлөвлөснөөс өнөөдрийн байдлаар 15.5 их наяд төгрөгийг төвлөрүүлж, төлөвлөгөөний 85 хувийг биелүүлжээ. Улсын төсвийн орлогоос 11.2 их наяд төгрөг төвлөрүүлэхээс 10 их наяд төгрөгийн гүйцэтгэлтэй буюу 90 хувийн биелэлттэй байгаа бол орон нутгийн төсвийн орлого 6.5 их наяд төгрөгөөс 5.5 их наяд төгрөгт хүрч, 80 хувийн гүйцэтгэлтэй байна.

Энэ оны орлогын төлөвлөгөөний биелэлтийн талаар урьдчилсан тооцоо гаргахад он дуустал 700 тэрбум орчим төгрөгөөр тасалдах эрсдэлтэй байгаа аж. Энэхүү тасалдалд нөлөөлж буй гол хүчин зүйл нь уул уурхайн салбар, нүүрсний дэлхийн зах зээлийн үнэ анх төсөвлөснөөс 50 орчим хувиар буурсантай холбоотой гэж албаныхан мэдээллээ.

Татварын өр хураах үйл ажиллагааны явцын талаар мэдээлэхдээ, өнөөдрийн байдлаар 265 мянга орчим татвар төлөгч хуулийн этгээд бүртгэлтэйгээс ААН-ийн 26 хувь буюу 72 мянга орчим нь татвар төлөгч төрийн албанд их бага хэмжээгээр өртэй байна. Эдгээр татвар төлөгчийн татварын өр  нийт өрийн хэмжээ 6.1 их наяд төгрөгт хүрсэн байна. Үүнээс уул уурхайн салбарт үйл ажиллагаа явуулдаг мянга орчим аж ахуйн нэгжийн өр 2 их наяд төгрөг бөгөөд бүх өрийн 30 орчим хувийг эзэлж байна.

Татварын алба 2025 онд “Зөвлөн туслах татварын алба” уриатай ажиллаж байна. Бичил, жижиг сегментийн татвар төлөгчдөд зөвлөгөө, үйлчилгээ хүргэж, эрсдэлээс урьдчилан сэргийлэхэд чиглэсэн үйл ажиллагааг эрчимжүүлж байна. Харин томоохон татвар төлөгчдөд татварын хууль тогтоомжийн хэрэгжилтийг хангах хяналтын үйл ажиллагааг үргэлжлүүлэн хэрэгжүүлж байгаа юм.

Мөн хоёр болон түүнээс дээш жилийн хугацаанд татвараа төлөөгүй, удаан хугацааны өртэй аж ахуйн нэгжүүдэд Татварын ерөнхий хуулийн дагуу холбогдох арга хэмжээг авч ажиллаж байна.