Авлигын гэмт хэргийн улмаас учирсан хохирлын нөхөн төлүүлэлттэй холбоотой мэдээллийг АТГ-аас танилцууллаа. 2019–2024 оны хооронд нийт 3.4 их наяд төгрөгийн хохирлыг дотоод, гадаад эх үүсвэрээс нөхөн төлүүлсэн байна. Үүнээс дотоодод 2.6 их наяд төгрөг, гадаадаас 13.9 сая ам.доллар буюу 50 гаруй тэрбум төгрөгийн хулгайлагдсан хөрөнгийг шүүхийн шийдвэрээр улсын орлого болгожээ. Жишээ нь, Виржиний арлын иргэнтэй холбоотой 1.6 сая ам.долларын үнэ бүхий үл хөдлөх хөрөнгийг улсын мэдэлд авчээ.

АТГ-ын мэдээлснээр нөхөн төлүүлсэн хөрөнгө төрийн дансанд төвлөрдөг бөгөөд түүнийг цаашид хэрхэн зарцуулах нь холбогдох байгууллагын бүрэн эрхийн асуудал юм. Авлигын улмаас алдагдсан хөрөнгө улсын хөгжилд ямар боломж алдагдуулж байгааг тооцоход өнөөгийн боловсролын салбар тод жишээ болж байна. Улсын хэмжээнд 108 сургууль, 95 цэцэрлэгийн барилга дутуу, Улаанбаатарт нийт 28 сургууль, 80 цэцэрлэг түрээсийн байранд үйл ажиллагаа явуулж байна.

Нэг ЕБС-ийн (960 суудалтай) барилга 26.3 тэрбум төгрөгийн өртөгтэй гэвэл 3.4 их наяд төгрөгөөр нийт 129 сургууль, харин 240 хүүхдийн багтаамжтай цэцэрлэг 13.8 тэрбумын өртөгтэй гэвэл 246 цэцэрлэг барих боломжтой байжээ. Түрээсийн байр, давчуу орчин, гурван ээлжийн сургалтын нөхцөл боловсролын чанарт шууд нөлөөлж буй бөгөөд хүртээмжийн гол асуудал шийдэгдээгүй хэвээр байна.

Олон улсын судалгаагаар авлигын улмаас алдагдсан боломжийг зөвхөн мөнгөн дүнгээр хэмжих боломжгүй гэж үздэг. Учир нь авлига иргэдийн төрд итгэх итгэлийг сулруулж, хүний эрхийг зөрчиж, улс орны институцийн тогтолцоонд ноцтой хор хохирол учруулдаг.

Судлаачдын хэлснээр, авлигыг үр дүнтэй бууруулахын тулд улс төрийн намын санхүүжилтийг ил тод болгох, төрийн байгууллага болон ТӨК-ийн худалдан авалт, ханган нийлүүлэлт, албан тушаалын томилгооны ил тод байдлыг сайжруулах шаардлагатай байна.