Монгол Улсын Шадар сайд бөгөөд Улсын онцгой комиссын дарга Х.Ганхуяг НОБГ-ын удирдлагууд болон есөн дүүргийн салбар хэлтсийн дарга нартай уулзаж, үүрэг чиглэл өглөө.
Хүн ам олноор төвлөрсөн нийслэл хотод объектын гал түймэр, халдварт өвчний тохиолдол буурахгүй байгаа нь салбарын нэн тэргүүний анхаарах асуудал болоод байгааг шадар сайд онцолсон байна. Улсын хэмжээнд сүүлийн долоон жилийн хугацаанд тохиолдсон гамшиг, аюулт үзэгдэл, ослын 66.4 хувь нь дангаараа нийслэлд бүртгэлтэй. Энэ нь гамшгаас урьдчилан сэргийлэх, эрсдэлийг бууруулах ажлыг бүх нийтийн оролцоонд тулгуурлан явуулах, нэн ялангуяа иргэдийг өөрийгөө болон бусдыг авран хамгаалах ажиллагаанд сургах, мэдлэг, дадлага олгох ажлыг тогтмол үр дүнтэй зохион байгуулж, иргэдийн сонор сэрэмжийг дээшлүүлэх шаардлагатайг харуулж байгааг дурджээ.
Мөн онцгой байдлын байгууллагын чадавхыг бэхжүүлэх, хууль эрх зүйн орчныг сайжруулах, гамшгаас хамгаалах сургалтыг бүх шатанд үр дүнтэйгээр зохион байгуулах, алба хаагчдыг чадавхжуулах, нийгмийн баталгааг сайжруулах тал дээр анхаарч ажиллахаа хэллээ. Тэрбээр онцгой байдлын байгууллагын анги, салбарын удирдлагууд алба хаагчдынхаа аюулгүй байдлыг хангах, сахилга батыг сайжруулахад анхаарч, шат шатандаа хяналт тавьж ажиллах, нийт алба хаагчдын эрүүл мэнд, хөдөлмөр хамгаалал, аюулгүй ажиллагаа, дүрэм, журмыг чанд баримталж, өдөр тутамдаа мөрдөж хэвшүүлэхийг үүрэг болгожээ.
