Нийслэл Улаанбаатар хотод хэрэгжүүлж буй томоохон төслүүдийн явц, тулгамдсан асуудлыг хэлэлцэж, гарц шийдэл тодорхойлдог ээлжит шуурхай хуралдаан өнөөдөр боллоо.

НИТХ-ын 25/111 дүгээр тогтоолоор Улаанбаатар хотын хөгжлийн бодлого бүхий бүтээн байгуулалтын төслүүдийг эрэмбэлэн эхний ээлжинд 16 төслийг шуурхай хэрэгжүүлэхээр шийдвэрлэсэн. Эдгээр төсөл нь нийслэлийн Засаг дарга бөгөөд Улаанбаатар хотын захирагчийн үйл ажиллагааны хөтөлбөрт тусгагдан, дийлэнх төслийн ТЭЗҮ-ийг баталж, мөн зарим төслийн бүтээн байгуулалт эхэлсэн.

Хурлыг Нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Т.Даваадалай удирдан явуулж, төслүүдийн хэрэгжилтийг хурдасгах, шуурхай зохицуулалт хийх чиглэлүүдийг өглөө.

Томоохон төслүүдийн газар чөлөөлөлт үргэлжилж байна. Ханын материал орчмын орон сууцжуулах төслийн хүрээнд нийт 213 нэгж талбар өртсөнөөс өнөөдрийн байдлаар 210-ыг чөлөөлж, 98 хувийн гүйцэтгэлтэй байна. Сэлбэ орчмын орон сууцжуулах төслийн хүрээнд 2206 нэгж талбараас 2086-ыг чөлөөлсөн бол Дулааны тавдугаар цахилгаан станцын төсөлд өртсөн 26 нэгж талбараас 19-ийг, Хог шатааж эрчим хүч үйлдвэрлэх үйлдвэрийн төсөлд өртсөн 158 нэгж талбараас 105-ыг чөлөөлжээ. Мөн Туулын хурдны зам төсөлд нийт 112 нэгж талбар өртсөнөөс 10-ыг нь өнөөдрийн байдлаар чөлөөлжээ.

Дүүжин замын тээвэр төслийн бүтээн байгуулалтын нийт гүйцэтгэл 70 гаруй хувьтай хэрэгжиж байгаа бол хоёрдугаар маршрутын ТЭЗҮ-ийг боловсруулж эхэлсэн. Хөрсний ус, үерийн хамгаалалтын төслийн ТЭЗҮ-ийг 12 дугаар сард боловсруулж дуусгаад ирэх оны нэгдүгээр сард батлуулахаар ажиллаж байна.

Хуралдааны төгсгөлд холбогдох албаны хүмүүст төслүүдийн гүйцэтгэлийг сайжруулах, газар чөлөөлөлтийг эрчимжүүлэх чиглэлийг үүрэг болголоо.