Лондоны Хатан хааны коллежийн эрдэмтэд анх удаа хүний шүдийг лабораторийн нөхцөлд амжилттай ургуулсан тухай мэдээлж байна. Энэхүү шинэлэг технологи нь унасан шүдийг дахин ургуулж, өнөөгийн ломбо, шүдний суулгац (имплант) зэрэг уламжлалт аргыг орлох боломжтой гэж судлаачид онцолжээ.

Шүд ургах байгалийн үйл явцыг дуурайлгасан тусгай биологийн материал бүтээсэн нь энэхүү дэвшлийн гол түлхүүр болсон байна. Тус материалаар эсүүд харилцан дохио солилцож, шүдний эд, бүтэц бүрэлдэх үйл явц идэвхждэг аж.

Хатан хааны коллежийн шүдний нөхөн сэргээх эмчилгээний албаны захирал, доктор Ана Ангелова Волпони “Энэ бол шүдний эмчилгээний салбарт хувьсгал авчрах нээлт” хэмээн тодотгожээ. Байгаль дээр махчин загас, заан зэрэг зарим амьтан шүдээ дахин ургуулдаг ч, хүний хувьд ийм чадвар байдаггүй нь энэ судалгааг онцгой болгож байгаа юм.

Арав гаруй жилийн турш Эзэн хааны коллежийн эрдэмтэдтэй хамтран хийсэн энэхүү судалгаагаар уламжлалт ломбо болон суулгацын сул талыг ч мөн тэмдэглэжээ:

• Ломбо нь цаг хугацааны явцад шүдний бүтцийг өөрчилж, цоорлыг дахин үүсгэх, мэдрэмтгий болгох эрсдэлтэй

• Имплант нь мэс заслын аргаар хийгддэг, ясны эдтэй бүрэн нийцэхгүй байх тохиолдолтой

• Аль аль нь хиймэл шийдэл тул жинхэнэ шүдний байгалийн үйл ажиллагааг бүрэн орлож чаддаггүй

Харин лабораторид ургуулсан шүд нь жинхэнэ шүд шиг байгалийн жамаар нөхөн төлжиж, эрүүний ястай бүрэн нийцдэг тул бат бөх, аюулгүй байж чадна гэж судлаачид онцоллоо. Энэхүү технологи шүд нөхөн сэргээх ирээдүйн байгалийн гаралтай, урт хугацааны шийдэл болж мэдэх юм.

Эх сурвалж: BBC