Чингэлтэй дүүргийн 14, 18 дугаар хороо болон Сүхбаатар дүүргийн 14 дүгээр хорооны нутаг дэвсгэрт хэрэгжих Сэлбэ дэд төвийн бүтээн байгуулалтын ажил албан ёсоор эхлэхэд бэлэн болжээ. Одоогоор газар чөлөөлөлт 85 хувьтай үргэлжилж байгаа бөгөөд чөлөөлөгдсөн хэсэгт нийслэлийн Засаг дарга Х.Нямбаатар болон холбогдох албаныхан ажиллаж, нөхцөл байдалтай газар дээр нь танилцсан байна.

Хотын дарга Х.Нямбаатар “Сэлбэ дэд төв” нь “20 минутын хот” үзэл баримтлалын хүрээнд хамгийн түрүүнд хэрэгжих 14 шинэ хотын анхны бүтээн байгуулалт гэдгийг онцолж, дараах мэдээллийг өгсөн:

• Эхний ээлжинд 4362 айлын орон сууц баригдана

• Барилгын ажлын гүйцэтгэгчийг сонгох хоёр багц тендерийг гуравдугаар сард зарласан

• Газар чөлөөлсөн хэсэгт цэвэрлэгээ, ариутгал хийж дуусгаад барилгын хашаа татна

• Зарим иргэд өөрсдийн санаачилгаар газраа чөлөөлөх хүсэлт гаргаж буй тул олонхийн дэмжлэгтэйгээр нэмж газар чөлөөлөлт хийх боломжтой гэж мэдэгдлээ

Чингэлтэй дүүргийн Засаг дарга Н.Мандуул мөн байр сууриа илэрхийлж, уулын энгэрт газар чөлөөлөгдөөгүй айлуудын хувьд шинэ хорооллуудыг илүү харагдац сайтай байршилд барих төлөвлөгөөтэй, хувийн хэвшилтэй хамтарч газраа чөлөөлөх, орон сууцжуулах сан байгуулан тогтвортой тогтолцоонд шилжих шаардлагатай гэж үзэж байгаагаа хэлэв.

Хотын дарга Х.Нямбаатар гэр хорооллыг орон сууцжуулах нь агаарын бохирдлыг бууруулах хамгийн үр дүнтэй шийдэл гэж үзэж буйгаа дахин илэрхийлээд, газраа чөлөөлөх сонирхолтой иргэдийн саналыг авах ажлыг эхлүүлэхийг холбогдох албаныханд үүрэг болгосон байна.

Эх сурвалж: Нийслэлийн ЗДТГ