Хүн төрөлхтөн сансарт хөл тавьсан мөчөөс хойш өөр гарагт суурьшина гэх төсөөлөл зөвхөн шинжлэх ухааны уран зөгнөл байхаа больж, бодит зорилго болон хувирчээ. Өнөөдөр энэ хүсэл мөрөөдлийн төвд Ангараг гараг буюу Улаан нүдэн оршиж байна. Жил бүрийн арваннэгдүгээр сарын 28-ныг Марсын өдөр болгон тэмдэглэдэг нь ч энэ чиглэлийн эрэл хайгуул хэр идэвхтэй байгааг илтгэнэ.

Одоогийн байдлаар Ангараг гарагийг эзлэн суух тухай хамгийн тодорхой зорилтыг АНУ л тавьж байна. Онолын хувьд хүнтэй нислэгийг 2030 он гэхэд хийх боломжтой гэж үздэг ч колончлолын бодит төлөвлөгөө хараахан тодорхойгүй байгаа. Ангараг дээр анхны суурин байгуулах тухайд XXI зууны төгсгөл рүү л шилжих магадлалтай.

SpaceX компанийн тэргүүн Илон Маск 5–7 жилийн дотор хүн Ангарагт хөл тавина гэж мэдэгдсэн. Гэвч энэ нь зөвхөн техник, санхүүгийн хувьд бус, хүний эрүүл мэнд, сэтгэлзүй, хууль эрх зүйн олон асуудлыг шийдвэрлэх шаардлагатай амбиц юм. Нөгөө талаас, АНУ-ын Ерөнхийлөгч асан Дональд Трамп Ангараг дээр АНУ-ын туг хатгана хэмээн амлаж байсан ч энэ нь илүү улс төрийн уриа, бодит байдалтай нийцэх эсэх нь эргэлзээтэй.

Харин сансарт суурьшуулах мөрөөдөлтэй зэрэгцэн, шинэ зэвсэглэлээр өрсөлдөх санаархал ч дагалдаж байна. Генерал Стивен Уайтингийн зүгээс сансрын орон зайд Америкийн зэвсгийг байрлуулах ёстой гэж мэдэгдсэн нь энхийн судалгаа, аялал жуулчлалаас илүүтэйгээр геополитикийн ноёрхлыг чухалчилж байгааг харуулна. Хэрэв энэ бодлого хэрэгжвэл сансар судлал зөвхөн шинжлэх ухааны дэвшил бус, дэлхийн улс төрийн хурц сэдэв болох төлөвтэй.

Эх сурвалжууд: Izvestia, MRG Online.