НИТХ-ын ээлжит бус V хуралдаанаар Улаанбаатар хотод метро байгуулах төслийн шинэчилсэн техник, эдийн засгийн үндэслэлийг (ТЭЗҮ) хэлэлцэн, төлөөлөгчдийн олонхийн саналаар дэмжиж, Засгийн газарт хүргүүлэхээр боллоо. Энэ талаар НИТХ-ын дарга А.Баяр “Улаанбаатарт метро барих асуудлыг бодитой шийдвэрийн шатанд хүргэж буй түүхэн алхам” хэмээн онцолсон юм.

Метроны төслийг анх 2011 онд Засгийн газрын 411 дүгээр тогтоолоор эхлүүлсэн бөгөөд БНСУ-ын “Духа Инженеринг” тэргүүтэй консорциум 2024 оны долдугаар сарын 5-нд гэрээ байгуулж, төслийн менежментийн зөвлөх үйлчилгээ үзүүлж байна.

Метроны нэгдүгээр шугамыг Энхтайваны өргөн чөлөө дагуу Толгойтоос Амгалан чиглэлд нийт 15 өртөө, нэг депо бүхий 19.4 км урттайгаар төлөвлөсөн бөгөөд 14 өртөө нь газар доогуур байрлана. Туннель болон өртөөг “доороос дээш ухах, хучих” аргачлалаар барихаар төлөвлөж, газрын гүний түвшин 10-25 метр байх тооцоололтой байна.

Төслийн үндсэн үзүүлэлтүүд:

• Нийт төсөвт өртөг: 2.4 тэрбум ам.доллар

• Санхүүжилтийн бүтэц:

  • 15 хувь – Нийслэлийн төсөв

  • 85 хувь – Гадаад эх үүсвэр

• Ашиглагдах стандарт:

  • Монгол Улсын 28 стандарт

  • Олон улсын 56 стандарт

Метроны төсөл хэрэгжих явцад захиалагчийн хяналт, газар чөлөөлөлт, хууль эрх зүйн уялдаа холбоог хангах зэрэг асуудлыг давхар шийдвэрлэхээр төлөвлөж буйг НИТХ-ын төлөөлөгч Л.Хосбаяр хэллээ.

Үүний дараа НИТХ-ын Ардчилсан намын бүлгийн дарга Т.Батцогт “Хотын тулгамдсан асуудлуудыг өнөө маргаашаа аргацаасан байдлаар өнгөрөөх боломжгүй болсон. Улаанбаатарт метроны хэрэгцээ, шаардлага зайлшгүй байгаа. Аливаа төслийг хэрэгжүүлэхдээ хүн төвт, иргэдийн аюулгүй байдлыг хангаж ажиллах, иргэдийг олон талын тодорхой, бүтээлч мэдээ, мэдээллээр хангах чухал байна. Метро төслийн гүйцэтгэлийн түвшинд нийслэлийн бизнес эрхлэгчдийг татан оролцуулах, залуусыг боломжит ажлын байраар хангаж ажиллах нь зүйтэй гэж манай намын бүлэг үзэж байна” хэмээн дүгнэлт хэллээ.

Эх сурвалж: НИТХ