Цахим хөгжил, инновац, харилцаа холбооны сайд Ц.Баатархүү дроны хууль, туршилтын бүс байгуулах, дрон нисгэгч операторуудыг сургах сургалтын хөтөлбөр боловсруулах гурван ажлын хэсэг байгуулж, энэ сарын 13-ны өдөр анхны хурлаа зохион байгууллаа.
Ажлын хэсэгт:
- Радио, телевизийн үндэсний сүлжээ УТҮГ
- Батлан хамгаалах яам
- Зэвсэгт хүчний жанжин штабын Агаарын цэргийн командлал
- ШУТИС, ШУА-ийн Физик, технологийн хүрээлэн
- Монголын Дрон нисгэгчдийн холбоо
- Хобби зон ХХК
- Дроны улсын аварга шалгаруулах анхдугаар тэмцээний шүүгч н.Цэнд-Очир зэрэг байгууллагуудын төлөөлөл багтжээ.
Монгол Улсад 2016 оноос дроны хэрэглээ бий болсон бөгөөд энэ салбарыг хөгжүүлэх зорилгоор дроны хууль эрх зүйн орчныг бүрдүүлэх, туршилтын талбай байгуулах, дрон нисгэгч операторуудыг сургах асуудлыг шийдвэрлэхээр ажиллаж байна.
Ажлын хэсгийн хурлаар:
- Дроны бүртгэлийн асуудал
- Олон улсын чиг хандлагатай уялдуулах зохицуулалт
- Дрон нисгэгч оператор бэлтгэх сургалтын хөтөлбөр
- Туршилтын бүсийн үр ашигтай ажиллагааны төлөвлөгөө зэрэг асуудлыг хэлэлцэв.
Цахим хөгжил, инновац, харилцаа холбооны яам Баянзүрх-Налайх дүүрэг болон Дархан-Уул аймагт дроны туршилтын бүс байгуулахаар төлөвлөж байгаа бөгөөд олон улсын төлөөлөгчид, инженерүүд зохион бүтээсэн дроноо турших боломжтой болох аж. Ингэснээр гадаадын хөрөнгө оруулалт нэмэгдэх бөгөөд дрон нь Монгол Улсын эдийн засагт хувь нэмэр оруулах боломжтой гэж үзэж байна.
Мөн дроны улсын аварга шалгаруулах анхдугаар тэмцээнээс хойш хүүхэд, залуусын дрон зохион бүтээх хандлага нэмэгдэж байгаа тул уг туршилтын бүсийг тэмцээн, уралдааны төв болгон хөгжүүлэх төлөвлөгөөтэй байна.
Үүнээс гадна, дрон нисгэж буй иргэдийг албан ёсоор гэрчилгээжүүлэх, мэргэшсэн оператор бэлтгэх ажлыг хийх нь зүйтэйг талууд онцолжээ. Ингэснээр:
- Дрон нисгэх албан ёсны эрхтэй операторууд бий болно.
- Спортын тамирчдад зэрэг дэв олгох боломж бүрдэнэ.
- Дронтой холбоотой аюул, эрсдэлээс урьдчилан сэргийлэх нөхцөл бүрдэх юм.
Одоогоор Монгол Улсад дрон худалдан авч буй иргэдэд анхан шатны мэдлэг олгох үйл ажиллагаа хязгаарлагдмал байгаа бөгөөд цаашид энэ чиглэлээр боловсрол олгох ажлыг эрчимжүүлэх шаардлагатай байна.
Эх сурвалж: Цахим хөгжил, инновац, харилцаа холбооны яам
