Монгол Улсын Ерөнхийлөгч У.Хүрэлсүх хоёрдугаар сарын 6-ны өдөр “Эхийн алдар” одонгоор шагнах журамд өөрчлөлт оруулах тухай 13-р тоот зарлиг гаргажээ.

Шинэ журмын дагуу “Эх хүсэлт гаргасан тохиолдолд нэгээс дээш настай нас барсан хүүхдийг "Эхийн алдар" одонгоор шагнах хүүхдийн тоонд оруулж болно” гэж заасан байна. Өмнө нь ийм зохицуулалт байгаагүй бөгөөд Монгол Улсын аварга О.Хангай уг өөрчлөлтийн саналыг Ерөнхийлөгчид уламжилсан байна.

Энэхүү өөрчлөлтөөр, дөрвөн хүүхэд төрүүлсэн ч нэг нь нэгээс дээш нас хүрсний дараа эндсэн бол эхийн II одон авах боломжтой болж байгаа юм.

Шинэ журам 2025 оны хоёрдугаар сарын 6-наас хүчин төгөлдөр хэрэгжиж эхэлсэн бөгөөд “Эхийн алдар” одон авах эхчүүд 2025 оны дөрөвдүгээр сарын 1-ээс өмнө материалаа бүрдүүлэн өгөх шаардлагатай аж.