УИХ-ын энэ сарын 16-ны өдрийн чуулганы хуралдаанаар Санхүүгийн зохицуулах хорооны дарга, зарим гишүүнийг томилох, чөлөөлөх тухай асуудлыг хэлэлцэн, УИХ-ын холбогдох тогтоолуудыг баталсан юм.
Шинээр томилогдсон албан тушаалтнууд ажлаа хүлээн авч, УИХ-ын тогтоолыг танилцуулах үйл ажиллагаа Санхүүгийн зохицуулах хорооны хүндэтгэлийн танхимд боллоо. УИХ-ын Ерөнхий нарийн бичгийн дарга Б.Баасандорж, Үндсэн хуульд оруулсан өөрчлөлтөөр УИХ-аас батлан гаргаж буй хуулиудын хэрэгжилтэд хяналт тавих чиг үүрэг бүхий хуультай болох асуудлыг тусгасны дагуу 2020 онд УИХ-аас Хяналт шалгалтын тухай хуулийг баталсан. Мөн өнгөрсөн оны долоодугаар сарын нэгнээс Хяналт шалгалтын тухай хуулийн шинэчилсэн найруулга хэрэгжиж эхэлсэн юм. Энэ хүрээнд 126 гишүүнтэй парламентын анхны гэж хэлж болох, Үндсэн хуулийн үзэл баримтлалын хүрээнд зохион байгуулсан томилгоог өнөөдөр хийлээ. Тодруулбал Санхүүгийн зохицуулах хорооны дарга, орон тооны бус гишүүд, Хяналтын зөвлөлийн дарга, гишүүдийг Хяналт шалгалтын тухай хуульд заасан журмын дагуу нээлттэйгээр нэр дэвшүүлж, сонгон шалгаруулж, томилсон хэмээн онцоллоо.
УИХ-аас Санхүүгийн зохицуулах хорооны даргаар Т.Жамбаажамцыг томилж, бүрэн эрхийн хугацаа нь дуусгавар болсон тул тус хорооны даргын үүрэгт ажлаас Д.Баярсайханыг чөлөөлөв. Санхүүгийн зохицуулах хорооны орон тооны бус гишүүнээр Б.Саруул, Ш.Хандсүрэн нарыг томилсон. Тиймээс бүрэн эрхийн хугацаа нь дуусгавар болсон тул тус хорооны орон тооны бус гишүүний үүрэгт ажлаас Б.Батхишиг, Б.Баярдаваа, Н.Мандуул нарыг тус тус чөлөөллөө.
Түүнчлэн уг хорооны Хяналтын зөвлөлийн даргаар М.Буяндэлгэрийг, Хяналтын зөвлөлийн гишүүнээр О.Оч, Ч.Сайханбилэг, С.Халиунаа, Б.Энхбаяр нарыг тус тус томилж, бүрэн эрхийн хугацаа нь дуусгавар болсон тул Санхүүгийн зохицуулах хорооны Хяналтын зөвлөлийн даргын үүрэгт ажлаас Р.Ринчинбазарыг, Хяналтын зөвлөлийн гишүүний үүрэгт ажлаас Б.Амарсанаа, Д.Цэрэнбадам, Ж.Эрдэнэбилэг нарыг тус тус чөлөөлөв.
