1990 онд дэлгэцнээ гарсан “Гэртээ ганцаараа” киноны байшинг 5.5 сая ам.доллароор худалдсан тухай TMZ цахим хуудсанд мэдээлжээ.
Иллинойс муж улсын Чикаго хотын захад орших уг байшинг өнгөрсөн оны тавдугаар сард дуудлага худалдаанд тавьсан бөгөөд тухайн үед 5.25 сая ам.долларын үнэтэй байв. Унтлагын тав, угаалгын зургаан өрөөтэй, кино театртай, гаднаа дээвэр бүхий спортын талбайтай уг байшинг өмнөх эзэд нь 2012 онд 1.585 сая ам.доллароор худалдан авч байжээ.
Байшингийн дотор тал нь зураг авалтын багийнханд хэтэрхий давчуу байсан тул уг кинонд зөвхөн гадна талыг нь харуулжээ. Харин Макаллистерийнхны байшин доторх үзэгдлүүдийг авахын тулд кино бүтээгчид ойролцоох ашиглахаа больсон сургууль дотор хоёр давхар зураг авалтын талбай хийсэн байна.
"Гэртээ ганцаараа" киноны нэгдүгээр анги 1990 оны 11 дүгээр сарын 10-нд кинотеатруудын дэлгэцнээ гарчээ. Дараа нь тус киноны дахин дөрвөн ангийг бүтээсэн боловч эхний ангид тоглосон жүжигчид зөвхөн хоёрдугаар ангид нь оролцсон байна.
Тухайн үед бизнес эрхлэгч байсан, харин одоо АНУ-ын Ерөнхийлөгчөөр сонгогдоод байгаа Дональд Трамп уг киноны хоёрдугаар ангид жижиг дүрд тоглосон билээ. 2016 онд сонгуульд ялсных нь дараа түүний тоглосон хэсгийг "YouTube"-ээр олон сая хүн үзэж байжээ.
