“Starship” сансрын хөлгийн долоо дахь туршилтын үеэр дээд угсраа хэсэг дэлбэрсэн гэж “SpaceX” компани пүрэв гарагт мэдэгджээ. 

“Уг хөлөг осолдож сүйрсэн гэдгийг бид баталж байна” гэж “SpaceX”-ийн ажилтан Кэйт Тис хөөргөлтийн шууд дамжуулалтын үеэр хэлжээ.

И.Маскийн компанийн мэргэжилтнүүд мэдэгдэхдээ, сансрын хөлөг сүйрсэн гэсэн байна. Өмнөх пуужингуудаас хоёр метрээр өндөр “Starship”-ын дээд угсраа хэсэг нь хөөргөснөөс дөрвөн минутын дараа төлөвлөсний дагуу “Super Heavy” тээгч пуужингаас амжилттай салсан байна.

Гэвч хэдхэн минутын дараа “SpaceX”-ийн харилцаа холбооны менежер Дан Хуот шууд дамжуулалтын үеэр хэлэхдээ  “хөлөгтэй холбоо тогтоож байгааг дурдаад, тээгч пуужин бууж ирэхийг харах үнэхээр сайхан байсан, гэхдээ бид хөлгийн тухайд сэтгэл дундуур байна” гэжээ. Юу болсныг тодорхойлоход цаг хугацаа шаардагдана гэж тэрбээр нэмж хэлсэн байна.  

“Starship” нь Техасаас Мексикийн буланг дамнан Дэлхийг тойрох ёстой байжээ. Уг хөлөгт 10 ширхэг хиймэл дагуулын дуураймал хувилбарыг ачсан байсан бөгөөд тэдгээрийг буулгах сургуулилалт хийх ёстой байв. Сайжруулсан “Starship” систем нь ойролцоогоор 37 давхар байшинтай тэнцэх өндөр бөгөөд Техасын Бока Чика дахь “SpaceX”-ийн байгууламжаас орон нутгийн цагаар 17:38 цагт хөөрчээ. Энэ нь компанийн долоо дахь, 2025 оны анхны туршилт байв.