Ирэх аравдугаар сард болох орон нутгийн сонгуульд нэр дэвшигчдийг СЕХ бүртгэж дуусаад байгаа. Удахгүй болох орон нутгийн сонгуультай холбоотойгоор АН-ын гишүүд цаг үеийн асуудлаар мэдээлэл хийлээ. 

Нийслэлийн АН-ын дарга Т.Батцогт:

-"Нийгэмд болж бүтэхгүй байгаа асуудлыг иргэдийнхээ төлөө, зоригтой, шударгаар дуугардаг дуу хоолой болсон иргэдийн манай нам энэ удаагийн сонгуульд нэр дэвшүүлсэн. 

Ажил хийх хүн боловсрол мэдлэг өндөртэй, мэргэжлийн, мэргэшсэн байх ёстой. Ажил хийх хүмүүс тусдаа учраас манай баг мөрийн хөтөлбөр боловсруулсан. Харин иргэдийг төлөөлж ажиллах, нийслэлийн асуудалд иргэдийн дуу хоолой болж ажиллах хүмүүс өөр байх ёстой. 

АН нийслэлд өөрийн мөрийн хөтөлбөрийг дэвшүүлсэн. Энэ мөрийн хөтөлбөрийг хэрэгжүүлж ажиллах, шударга дуу хоолой болж явах хүмүүс бол манай нэр дэвшигчид. Тиймээс энэ удаагийн орон нутгийн сонгуульд ялна гэсэн бат итгэлтэй байна" гэв.

"БИ ТӨСВИЙН ХУЛГАЙЧИДТАЙ ТЭМЦЭХЭЭР НИЙСЛЭЛИЙН СОНГУУЛЬД НЭР ДЭВШИЖ БАЙНА"

АН-ын гишүүн О.Батханд: 

-Өнөөдөр манай нийгэмд хяналтын тогтолцоо байна уу. Бидний төлж буй татварын мөнгө юунд урсаж байгаа вэ. Үүнд хүчтэй дуугарах хүчтэй сөрөг хүчин нийслэлд байна уу.

Бид эрх баригчидтай бялуу хувааж идээд сууж болохгүй. Эвдэрхий замтай Монгол улс жил бүр гантиг чулуугаар бордюр сольдог. Энэ нь хяналтгүй байгаагийн шинж. Жил бүр өвлийн хүйтэнд агаарын бохирдлоос болж хэдэн арван хүн амь насаа алддаг. Гэтэл дэлхийн дайнтай улс орнуудын хэмжээнд амь насаа алддаг. Ийм эмгэнэлтэй бөгөөд гашуун түүхийг бид цаашид давтах ёсгүй. Тиймээс хатуу хяналттай сөрөг хүчний үүрэг гүйцэтгэхийн тулд нийслэлийн АН-ын зүгээс 44 залууг илгээсэн. Хамгийн гол нь бид асар их мөнгө, эрх мэдлийн эсрэг явж байгаа. Ард түмэн дэмжинэ гэдэгт итгэж байна. 

Миний аав төр нийгмийн нэрт зүтгэлтэн, эх оронч З.Дорж амьд ахуйдаа "хэл, хил, мал гуравтайгаа байхад хэн баян, Монгол баян хэмээн" хэлсэн яруу найрагч байсан.

Миний аав малчдын мал хулгайд алдагдахад өөрийнхөө машинаар гараад малын хулгайчидтай тэмцдэг байсан. Харин би төсвийн хулгайчидтай тэмцэхээр нийслэлийн сонгуульд нэр дэвшиж байгаа юм.

Бид дөрвөн жилийн хэлэх үг, хийсэн ажилтай хүчтэй сөрөг хүчин байх болно. Ухаантай сонголт хийнэ гэдэгт бид итгэж байна. 

"АН-Д БАЯРЛАЛАА ГЭЖ ХЭЛЬЕ. НАМАЙГ ХҮН ТООДОГ НАМ БАЙДАГ ЮМ БАЙНА"

АН-ын гишүүн Ө.Эрдэнэболд: 

-Миний хувьд хуваариа бизнес хийдэг. Яагаад энэ намд орж, сонгуульд нэр дэвших болсныг хүмүүс гайхаж байх шиг байна. 

Ер нь бол биеэ засаад гэрээ зас, гэрээ засаад төрөө зас гэдэг үг бий. Миний хувьд нас 40 гарч, биеэ, гэрээ засчихсан. Өөрийн гэсэн тодорхой бизнестэй болсон. Одоо улс орны эрх ашгийн төлөө явах ёстой гэсэн миний дотоод үзэл бодол бий. 

Нууж хаахгүй хэлэхэд би АН-д дөнгөж саяхан орсон. АН-ынхан намайг нийгэмд тодорхой хэмжээний нөлөө үзүүлдэг, хүмүүсийн дэмжлэг авдаг учраас албан ёсоор урьсан. АН-д баярлалаа гэж хэлье. Намайг хүн тоодог нам байдаг юм байна.

"СОНГИНОХАЙРХАН ДҮҮРГИЙН ГЭР ХОРООЛОЛТОЙ БҮСЭД НЭР ДЭВШСЭН"

АН-ын гишүүн, Люмино хамтлагийн дуучин Б.Батхишиг: 

-Миний бие энэ удаагийн орон нутгийн сонгуульд АН-аас нэр дэвшихээр шийдсэн. Т.Батцогт дарга өмнө нь "манай намд хэн ч элсээд, нэр дэвшиж болно" гэж хэлж байсан. Би бол үүний нэг жишээ. Иргэдийн өмнөөс хуралд сууж буй хүмүүс намын цүнх баригчид биш байх ёстой. Иргэдийн төлөө тэмцэж чадах хүмүүс иргэдийн төлөөлөгчийн хуралд байх ёстой. Өнөөгийн намын систем цүнх баригч, хамаатангийн систем байгаа. Үүнийг жаахан ч гэсэн өөрчлөх хэрэгтэй. 

Миний хувьд алслагдмал, Сонгинохайрхан дүүргийн гэр хороололтой бүсэд нэр дэвшсэн. Улаанбаатар хотод зарим газартаа аз жаргалтай амьдарч байгаа байх. Зарим газар нь маш хөгжилгүй байна. Ер нь тухайн газарт нь хөгжлийг авч очвол заавал хотын төв рүү ирэх шаардлагагүй. Алслагдмал газарт хотын соёл, гэгээрлийг хүргэх хэрэгтэй. Энэ тал дээр илүү анхаарч дуугарах болно. 

Би хэзээ ч улстөрч болно гэж боддоггүй. Би бол улстөрч биш, чөлөөт уран бүтээлч. Өөрийнхөө дуртай зүйлийг хийдэг хүн. Нийгмийн хариуцлагын хүрээнд уран бүтээлч хүн уран бүтээлдээ шүүмжилж байдаг. Би үүний дуу хоолой байсаар ирсэн.