Өчигдөр төрийн ордонд хоёр дахь өдрөө үргэлжилсэн Нүүрсний сонсголын дараа АН-ын дарга Лу.Гантөмөр МАН-ынханд хандаж нэгэн мэдэгдэл хийлээ. Сонсголын үеэр АН-ын дарга Лу.Гантөмөр нь МҮДН фракцид байхдаа эхнэрийнхээ нэр дээр компани байгуулж, 50.000 тонн нүүрс худалдаж авсан, зарж борлуулсан хэмээн мэдээлсэн. Үүнтэй холбоотойгоор АН-ын дарга дараах мэдэгдлийг хийжээ. Улс төрийн өрсөлдөгчид болох МАН-ын дарга, удирдлагуудад хандаж...

Лу.ГАНТӨМӨР: МАН-ЫН ЗАЛУУСТ ХЭЛЬЕ. ЖААХАН УХАМСАРТАЙ БАЙ, ЦЭВЭРХЭН ӨРСӨЛД

Сүүлийн өдрүүдэд нүүрсний сонсгол болж байна. Нүүрсний хулгай Монголд нүүрлэж, Монголын эдийн засгийг асар ихээр хохироосон тухай бид бүгдээрээ мэдэж байна.

5.7 сая тонн нүүрсийг Монголын хил гаалиар бүртгүүлэлгүйгээр гаргаад, Хятадын хил дээр бүртгэлүүд нь хийгдсэн байна. Үүний хариуцлагыг найман жилийн хугацаанд засагласан МАН-ын Засгийн газрын тэргүүнүүд хүлээх учиртай. Харамсалтай нь, 15-16 жилийн өмнөх, магадгүй 20 жилийн өмнөх нүүрсний асуудлууд гээд “Тавантолгой” ХК-тай холбоотойгоор Ардчилсан намыг 5.7 сая тонн нүүрснийхээ хулгайтай зэрэгцүүлэн харлуулах ажил руу орчихлоо. МҮДН фракцын гишүүд аж ахуй нэгж байгуулаад 50 мянган тонн нүүрс худалдаж авсан мэтээр ярьж байна.

Би бол 20 жилийн өмнө МҮДН фракцад байсан, МҮДН фракцын УИХ-ын гишүүн байлаа. Бид тухайн үед УИХ-ын гишүүдээрээ нийлээд улс төрийн клуб байгуулъя гэж ярилцаж байсан. Одоо манай намын гишүүд клубууд байгуулчихсан энд тэнд хуралдаад байгаа шүү дээ. Түүн шиг клуб байгуулъя, клубын үйл ажиллагаа явуулахын тулд байр савтай болъё гээд тухайн үед аж ахуй нэгж байгуулах тухай яригдаад өнгөрсөн. Би дараа жил нь МҮДН фракцаас гараад явсан. Бусад нөхөд маань клубээ байгуулаад үйл ажиллагаа явуулж байгаа байх. Тэр компани нь хаана байрласан юм, хэн захирал болсон юм, ямар үйл ажиллагаа явуулсан юм  би мэдэхгүй. Тухайн үед УИХ-ын гишүүд байсан учраас хуулийн этгээдийн нэр дээр эхнэр, хүүхдээ оруулсан юм бий байх. Энэ компани ямар нэгэн байдлаар бизнес хийгээд, лиценз аваад явсан гэж би лав мэдэхгүй. Манай эхнэр тэр компанийн ажилд оролцож үзээгүй.

Би 15 жилийн өмнө МҮДН фракцаас гарсан. Залуучуудад боломж олгоё, үе солъё. Монголын улс төрд шинэ үеийг оруулж ирье гээд "Нэг ардчилал клуб"-ээ байгуулаад явсан түүх бий. Юм болгон дээр Л.Гантөмөрийн эхнэр рүү, хүүхэд рүү дайрдаг довтолдог, гүтгэдэг, доромжилдог МАН-ын энэ ажил цаашид ч явна. Ардын нам үүнийг системтэйгээр хийдэг. Гэхдээ, МАН-ынхан та нарт хандаад хэлэхэд ичмээр байна шүү. Улс төрийн бодлоготнууд юм бол бодох хэрэгтэй байна шүү. Та нарт ч гэсэн гэр бүл, үр хүүхэд бий шүү. Гэр бүл, үр хүүхэд гэдэг нандин зүйлээ улс төрийн хэрүүлтэй холиод, хутгаад явах юм бол Монголын ирээдүй бүрхэг шүү. Та нар жаахан ичих хэрэгтэй.

Залуу хүмүүс байж магадгүй, Алдахыг чинь үгүйсгэхгүй байна. Би ч ялгаагүй тухайн үед 35 настай байж үзсэн. 35-тай, 40-тэй залуучууд алддаг. Алдахдаа ийм муухай юм руу битгий ороорой. Би 12 жил УИХ-ын гишүүнээр ажилласан. УИХ-ын гишүүнээр ажиллах хугацаандаа нэг ч лиценз аваагүй, газар аваагүй. Та нарын хийгээд байгаа шиг дээрэм тонуулд ороогүй. Бүгдийг өөрсөдтэйгээ адилхан юм шигээр харлуулж битгий бод. Надад ч гэсэн алдаа оноо бий. Алдаагаа засч байж амжилтад хүрдэг шүү. Алдаа оноотой ч гэсэн надад хайртай гэр бүл бий. Та нарт байгаа. Миний туулсан 35, 40-тэй амьдралыг та нар туулна. Тийм болохоор зүгээр л өрсөлд. Бодлогоо яриад сонгуульд өрсөлд л дөө. Ичдэггүй юм уу. Та нарыг хэний мөнгөөр яаж сонгууль хийснийг монголчууд бүгд мэдэж байгаа. 2020 оны УИХ-ын сонгуульд Улаанбаатар хотод МАН-ын нэрээр нэр дэвшсэн хүмүүст хэн мөнгө өгснийг бүгд мэдэж байгаа. Жаахан ухамсартай бай.