Амьгүй донороос эд, эрхтэн авсантай холбоотой асуудлаар Ажлын хэсэг хяналт шалгалт хийж байгаа талаар Эрүүл мэндийн сайд С.Чинзориг мэдээлэл хийлээ. 

Тэрээр "ЭМЯ-наас мэдээлэл авсан даруйд уг асуудлаар дүгнэлт гаргах ажлын хэсэг томилон хяналт шалгалтыг эхлүүлсэн. Албан ёсны дүгнэлт гарч үүссэн нөхцөл байдлыг бүрэн тогтоосны дараа ямар нэг буруутай үйл ажиллагаа явагдсан эсэх талаар үндэслэлтэй, тэнцвэртэй мэдээллийг хүргэх болно.  

Хүний эс, эд, эрхтэн шилжүүлэн суулгах үйл ажиллагааг манай улсад Донорын тухай хуулиар зохицуулж байгаа бөгөөд 2018 оноос амьгүй донороос эс, эд, эрхтэн шилжүүлэн суулгах эрх зүйн орчин бүрдүүлж, өдгөө 58 хүний амь насыг аварсан байна.

Нэг амьгүй донороос эс, эд, эрхтэн шилжүүлэн суулгах үйл ажиллагааг 50-60 хүний бүрэлдэхүүнтэй 4-5 баг хэрэгжүүлдэг тул эд, эрхтэний хулгай, наймаа явагдах ямар ч боломжгүй, энэ нь үндэслэлгүй мэдээлэл. 

Харин донороос эс, эд эрхтэн авахдаа ар гэрт нь мэдээлэл дутуу өгч, сайтар ойлгуулаагүй нь бидний алдаа болсон. Ер нь амьгүй донороос эс, эд, эрхтэн авах зөвшөөрөл авах үйл ажиллагаа нь амаргүй нөхцөл байдалд явагддаг. Хайртай дотны хүнээ алдаж, уй гашууд автсан ар гэрийнхэнд донор болох санал тавьж, тайлбарлан ойлгуулах нь амаргүй хүнд ажил болохыг Та бүхэн маань сайн ойлгож байгаа байх аа.

Нийгмийн сүлжээгээр зүрх нь зогсоогүй хүний эс, эд, эрхтэнийг авсан мэт мэдээлэл түгээж байгаа нь туйлийн хариуцлагагүй үйлдэл гэж үзэж байна.

Донорын тухай хуулийн:

• 15.1-д Тархины үхэлтэй нь тогтоогдсон донороос эс, эд, эрхтэн авна.

• 15.3-т “Амьгүй донороос эс, эд, эрхтэн авахдаа зүрхний үйл ажиллагааг зохиомлоор удирдана... гэж маш тодорхой зохицуулсан байдаг.

Хүнийг амьд байхад нь эд, эрхтнийг нь авсан мэтээр ташаа ойлголт төрүүлж болохгүй" гэлээ.