Монголын үндэсний олимпын хорооны Ерөнхийлөгч Б.Баттүшиг өнөөдөр “Ханжоу-2022” Азийн наадмыг сурвалжлах хэвлэл мэдээллийн багийн төлөөллүүдийг Олимпик хауст хүлээн авч уулзлаа.
Уулзалтад МҮОХ-ны Тэргүүн дэд ерөнхийлөгч Ч.Наранбаатар, Монголын спортын сэтгүүлчдийн холбооны Ерөнхийлөгч Б.Цагаанбаатар тэргүүтэй хэвлэл мэдээллийн байгууллагын төлөөллүүд оролцлоо.
Энэ үеэр МССХ -ны Ерөнхийлөгч Б.Цагаанбаатар “Ханжоу 2022” Азийн наадмыг түүхэндээ хамгийн өргөн бүрэлдэхүүнтэй буюу нийт 38 гишүүнтэй баг сурвалжлах болсныг онцолж, багийн ахлагчаар Соёлын гавьяат зүтгэлтэн, спортын гэрэл зурагчин Ч.Ганбат ажиллах болсныг танилцуулав.
"Ханжоу 2022" Азийн наадам эхлэхэд 15 хоногийн хугацаа үлдээд байна. Энэ наадамд Монгол Улсаас 34 спортын 36 төрөлд 400 гаруй тамирчин, албаны төлөөлөгч, дасгалжуулагч, шүүгчид 200 гаруй хүн оролцох юм. Баг тамирчдыг үдэн гаргах ёслол өнөөдөр болсон юм.
Дашрамд, өмнө нь Монголын тамирчид "Шар" тивийн Олимпын наадамдаа 11 удаа оролцож 24 алт, 46 мөнгө, 85 хүрэл нийт 155 медаль хүртэж байжээ.