Засгийн газрын хуралдааны дараа Хууль зүй, дотоод хэргийн эрх зүйн харилцан туслалцаа үзүүлэх гэрээний асуудлаар мэдээлэл өглөө.

Хууль зүй, дотоод хэргийн яамны төрийн нарийн бичгийн дарга П.Сайнзориг "Хуучин социалист орнуудтай байгуулсан ялтан солилцох болон эрх зүйн харилцан туслалцаа үзүүлэх гэрээнүүд байгаа.

Өнгөрсөн хоёр жилийн хугацаанд Куба, Макао зэрэг орнуудтай эдгээр гэрээг шинэчлэн байгуулах ажил хийгдсэн. Одоогийн байдлаар Зүүн Өмнөд Азийн зарим орон, Малайзтай гэрээ байгуулахаар яриа, хэлэлцээ хийж байна. Долдугаар сард Киргиз улстай гэрээ байгуулна.

Европын болон Америк тивийн улсуудтай эрх зүйн харилцан туслалцаа үзүүлэх гэрээ, байгуулахаасаа илүүтэй Европын Холбооны эрх зүйн харилцан туслалцаа үзүүлэх конвенцид нэгдэн орох бэлтгэл ажлыг хийлээ. Энэхүү конвенцид нэгдэн орсноор АТГ болон прокурорын байгууллага хамтран ажиллах боломжтой болно.

Эрх зүйн харилцан туслалцаа үзүүлэх асуудлыг ГХЯ-аар дамжуулан нөгөө улсдаа хүргүүлдэг. Тодорхой хугацааны цаг хугацаа зарцуулдаг.

Цаашид олон улсын хэд, хэдэн гэрээ, конвенцид нэгдэн орохоор судалж байна" гэлээ.

Харин Хууль зүй, дотоод хэргийн сайд Х.Нямбаатар "Гадаадаас авчирсан хүмүүсийн 50% нь эрх зүйн харилцан туслалцаа үзүүлэх гэрээтэй орноос ирсэн. Үлдсэн нь гэрээгүй орноос ирж байгаа. 

Эрх зүйн харилцан туслалцах гэрээгүй орноос интерполд нэгдсэн орсон болон хууль сахиулах байгууллагуудын хамтын ажиллагааны хүрээнд авчирсан.

Тухайлбал Филиппин улстай манай улс эрх зүйн харилцан туслалцаа үзүүлэх гэрээгүй. Бид Манилад буугаад хууль сахиулах байгууллагуудын удирдлагуудтай уулзан хүсэлтээ тавьснаар иргэнээ авчирсан.

ЕХ-ны улс орнууд, Вьетнам, Тайланд улстай эрх зүйн харилцан туслалцаа үзүүлэх гэрээ байгуулах шаардлага их байна. Манай иргэд эдгээр орон руу зорчих урсгал, гэмт хэрэгт холбогдох нь их болсон. Энэ жилийн төлөвлөгөөнд гэрээ байгуулахаар тусгасан боловч Зүүн Өмнөд Азийн хэд, хэдэн орны хууль сахиулах байгууллагын сайд нартай уулзах урилгатай ч очиж амжихгүй байна. Зарим нь манай улсад айлчилна.

Казахстан, Узбекистан, Киргизстан руу манай улсын иргэд зорчих нь нэмэгдсэн. Сүүлийн үед Киргизид манай ААН, байгууллагуудын хөрөнгө оруулалттай компаниуд олноор байгуулагдаж байна. 

Эрх зүйн харилцан туслалцаа үзүүлэх гэрээ нь зөвхөн гэмт хэрэгт холбогдсон иргэдийг шилжүүлэн авахаас гадна ялтан солилцох, Арбитрын шийдвэрийг харилцан хүлээн зөвшөөрөлцөж биелүүлэх зэрэг агуулгатай байдаг. Тиймээс Монгол Улсын ААН, иргэдийн хууль ёсны эрх ашиг, сонирхлыг хамгаалах нөхцөл бүрдэнэ" гэв.