Донтолт гэж маш олон юм, гэхдээ бүр гүндээ, цаанаа, энэ бол эвгүй байдлаас зугтаах, дааж, тэсэхгүй байгаа бодол, сэтгэл мэдрэмжээсээ зугтаах, бие махбодийн мэдрэхүйгээсээ зугтаах...
АМЬДРАЛААС зугтаах...
ХАЙРЫГ хайх... Бүх “буруу” газраас зугтах...
Зовлон шаналалтай байж чадахгүй байх. Аюултай юм хэрэглэж бас хийж аюулгүй байх гэж үзэх. Одоо байгаа энэ агшинаас зугтааж, өөр тийшээ очих оролдлого. Энэ биеэс гарч, өөр хувилбар луу орох гэж оролдох.
Сэтгэл санаагаа, мэдрэмжээ, өөрийн туршлагаа өөр гадны юм хэрэглэж, эсвэл өөрөөсөө өөр юманд найдан өргөж, өөрчлөх гэсэн оролдлого. Бодис. Хүн. Санаа. Юу байх нь хамаагүй. Юу мэдэрч байгааг чинь мэдрүүлэхгүй л бол юу ч яахав, нүүр тулах ёстойгоо мэдэж байгаа тэр нэг юмтай чинь нүүр тулгахгүй л байвал юу ч яахав. Нүүр тулах ёстойгоо мэдэж байгаа ч тулаагүй бүхэн биднийг байнга ирж зовооно, шүглэнэ.
Шүүмжлэх гэсэнгүй ээ. Өөрсдийгөө шүүмжилж зовоохгүй байх хамгийн чухал. Бид бүгд л ингэдэг. Бид бүгд зугтдаг. Бид бүгд хайдаг. Бид бүгд ямар нэг юманд донтсон байдаг...
Зарим нь согтууруулах ундаа, мансууруулах бодис, хоол. Зарим нь өшөө хорсол, контрол, манипуляц. Илүү дээр мэдрэмжтэй болгодог юу ч хамаагүй.
Зарим нь өөр хүмүүст донтоно. Тэдний хайр, зөвшөөрөл, анхаарал. Зарим нь итгэл үнэмшил, догма, шашин, гуру, удирдагчид донтоно. Тэд биднийг өөрсдөөс минь аварч магадгүй.
Зарим нь өөрсдийнхөө бодолд, фантазад, ирээдүйд донтоно. Эсвэл гэрээ цэвэрлэхэд. Гараа угаахад. Тавилгаа өөрчлөхөд. Хаалгаа цоожилсоноо шалгахад донтоно. Эсвэл бүх юм төгс төгөлдөр байхад донтоно.
Арай аюулгүй мэдрэмжтэй болгож байвал юу ч яахав. Сэтгэл түгшилээ зохицуулахын тулд юу ч яахав. Энд, яг одоод л байхгүй бол юу ч яахав.
Донтолт олон хэлбэр дүрстэй, гэхдээ гүндээ бол яг одоог хүлээн авахгүй байх, одоогоос зугтаж нисэх, өөртөө хайргүй байх, өөрийгөө хүлээн зөвшөөрөхгүй байх.
Дан ганц хүчтэй хүслээр бид донтолтыг дуусгаж чадахгүй. Бидний донтолтын объект, хэлбэр дүрс л өөрчлөгдөнө. Бид тамхи татах донтолтоос мөрийтэй тоглоом тоглох донтолт руу шилжинэ. Идэх донтолтоос сүнслэг ертөнцийн донтолт руу шилжинэ. Хайртдаа донтохоос гуру-д донтох руу шилжинэ. Ажилд донтохоос фитнест донтох руу шилжинэ.
Донтолтоос эдгэрэхийн тулд, бид өөрсдийнхөө дотортой нүүр тулах ёстой болно. Зугтахгүй, нүүрээ буруулахгүй.
Бид өшөө хорсол, гашуудал, ганцаардал, айдастайгаа нүүр тулна. Дотор байгаа хоосрол. Дүүргэх гэж оролдоод хэрэггүй. Хоосон орон зай. Маск зүүх гээд хэрэггүй. Магадгүй, магадгүй шүү, бид бүр цөмд нь очино.
Бүх л амьдралынхаа турш нэг юмнаас л нуугдаад байсан тэр юмандаа хүрч ч магадгүй. Тэгээд бид зэврүүн, харанхуй руу шумбаж ороод тэндээс гэрлийг олно.
Одоо байгаа агшинаас зугтаах сонирхолгүй болно, харин хүрч мэдэрч үзэх сонирхолтой болно. Бид Одоод донтоно.
Бид гайхалтай, замбараагүй, сонин, хүчтэй, хүчгүй, эмзэг, мэдрэмтгий өөртөө дурлана. Бид хүн болж төрсөн энэ хувь заяагаа дайраад өнгөрөхөө болино.
Бидэнд хайр өгч чадахгүй хүмүүст хайрлагдахын төлөө өөрийнхөө үнэн байдлаа нуухаа болино. Бусад биднийг ямар байлгахыг хүсэж байна, тийм байх сонирхолгүй болно.
Бид өөрсдийнхөө хамгийн түүхий үнэнг ярьж, үгүй бол үгүй гэдгээ хэлдэг болно. Бид нуувчнаасаа гарч ирээд, ингэж хэлнэ:
ХОРВОО ЕРТӨНЦӨӨ, БИ ЭНД БАЙНА.
БҮХ МУУ МУУХАЙТАЙГАА, ӨӨРИЙНХӨӨ ХҮЧ ЧАДЛААРАА, СОНИН ХАЧНААРАА, МИНИЙ СҮҮҮДЭР БАС ГЭРЭЛ. БИ ЭНД БАЙНА.
Орчуулсан: Freelance Journalist
