Сүүлийн өдрүүдэд иргэдийн дунд Газрын тухай долоон багц хууль багагүй шүүмжлэл дагуулсан. Тодруулбал, уул уурхайг дэмжиж, малчдыг шахсан, малаа нүд үзүүрлэсэн хэмээж байв. Тэгвэл Засгийн газраас Газрын тухай долоон багц хуулийг эгүүлэн татаж байгааг өнөөдөр мэдээллээ.
Маргаан дагуулаад буй газрын асуудлыг шийдвэрлэж, төлөвлөлтийн дагуу газар олгодог шинэ зарчимд шилжинэ гэдгээ Засгийн газраас онцлон мэдэгдлээ.
Энэ талаар Барилга хот байгуулалтын сайд Ц.Даваасүрэн дараах мэдээллийг өгөв.
Тэрээр "Ерөнхий сайдтай Нийслэлийн ерөнхий төлөвтэй холбоотой асуудлаар санал солилцлоо. Энэ хүрээнд ойрын хугацаанд гэр хорооллын дахин төлөвлөлт, түгжрэлийг талаар тодорхой төлөвлөгөө гаргаж батлуулахаар боллоо.
Мөн УИХ-д өргөн барьсан байгаа Газрын тухай долоон багц хуулийн төслийг эргүүлэн татахаар шийдлээ. Энэ хугацаанд нийслэлийн ерөнхий төлөвлөлтөө хийнэ. 2040 он хүртэлх Нийслэлийг хөгжүүлэх ерөнхий төлөвлөгөөг энэ ондоо багтаан батлуулахаар боллоо.
Тус хуульд малчдын эрх ашиг нэлээдгүй хөндөгдсөн байна. Уул уурхайг дэмжсэн хууль болсон гэдэг зүйлийг иргэд ярьж байна. Газрын асуудал нь нийслэлчүүдэд хүндрэлтэй байдаг. Тиймээс Ерөнхий төлөвлөлттэй уялдуулан газрыг олгодог болгохоор сайжруулаад эргэж хэлэлцүүлэхээр боллоо" гэв.
