Саяхан АН-ын даргын сонгуульд өрсөлдөж, Л.Гантөмөрт ялагдал хүлээсэн УИХ-ын гишүүн асан З.Нарантуяагийн ярилцлага toim.mn-д нийтлэгджээ. Тэр энэ удаагийн ярилцлагаараа Монголын улс төрийн нөхцөл байдал, улс төрийн намуудын бодит төрхийг ямар ч цензур, шүүлтүүргүйгээр байгаагаар нь хэлсэн байна. Багагүй хугацаанд бодож, төлөвлөж байж өгсөн түүний энэ удаагийн ярилцлага эмэгтэй хүнийх нь талаас харвал эрэгтэй улстөрчдийн толгой дээр "цахиур хагалахаар" зүйлүүдийг хэлсэн байна. Ялангуяа эрх баригч МАН-ын тухай...
УИХ-ын гишүүн асан, эдийн засагч З.Нарантуяа энэ тухай,
"Сонгуулийн тогтолцоо, төрийн эрх мэдлийн хуваарилалтын зарчим буруу байгаа нь асуудлын гол шалтгаан юмаа. Улс төрийн намуудын “хувьчлагдсан байдал” ч нөлөөлж байна. Намууд одоогийн бүтэц,бүрэлдэхүүнээрээ цаашаа явах боломжгүй, үйл ажиллагаа, дотоод соёл нь нийгмээс хол хоцорч байна. Магадгүй, бүх намуудыг татан буулгаж, шинээр эхлүүлэх цаг ч болсон байж мэднэ.
Ил зөрчилдөж нийгмээр шүүлгэж байгаа нь АН болохоос биш дотроо хагарахад бэлэн байгаа нь МАН. АН-ын хямрал нийгмийн хор хөнөөл багатай. Ялгарч, шүүгдээд, цэвэрлэгдэх процесстоо явж байна. Харин эрх барьж байгаа нам хуваагдаж, зөрчилдөх нь төрийг гацаах, сульдаах аюултай. М. Энхболдыг огцруулсан 2018 оны өвлийг хүмүүс мартаагүй байх. 6 жилийнхээ хугацаанд УИХ-ын үйл ажиллагааг 45 хоног гацааж, Засгийн газраа 4 удаа сольчихсон, сайд болж үзээгүй гишүүн бараг үлдээгүй, Ерөнхий сайд нь хэзээ ч огцорч болзошгүй хэврэг суудалд “намайг дэмждэг Парламенттэй болмоор байнаа” гээд сууж байна. УИХ нь Засгийн газрынхаа үйл ажиллагааг дэмждэггүй, Ерөнхий сайдаа УИХ нь дэмждэггүй, Ерөнхийлөгчийн засаглалтай улс шиг байна шүү дээ.
Энэ бол бусад намууддаа орон зай өгөхгүй, сонгуулийн хуулиар шахсаар байгаад зөвхөн бүртгэлийн гэрчилгээ, тамгатай нь үлдээсний гор юм. Сүүлийн 5 жилийн хугацаанд Хүрэлсүхийн Засгийн газрын үеэс АН-ыг жижиг намуудын хэмжээнд хүртэл бутаргах бодлого амжилттай хэрэгжиж байгаагийнх нь үр дагавар гэж хатуухан хэлмээр байна. Нам намаа хувьчилж авах гэж дотроо алалцаж, энэ их тэмцэл зодоон, өшөө хорсол нь төрийг бусниулж байгааг ард түмэн нийтээрээ ойлгож байгаа байхаа. Үүнийг олон намын оролцоотой, хүчтэй сөрөг хүчинтэй, тэнцвэр хадгалсан эрүүлжиж байгаа Парламент л засч чадна" хэмээн ярьжээ.
Дашрамд сануулахад, нийтлэгдсэн даруйдаа шуугиан тарьж, эрх баригч намын лидерүүдийн толгой дээр "цахиур хагалсан" ярилцлагын эзнийг Л.Гантөмөрийн багт орж, АН-ын "генсек"-ээр томилогдож магадгүй гэсэн багахан айдас, бас заримд нь хүлээлт улс төрийн хүрээнд үүсээд байгаа нь ч нууц биш. Гэвч энэ бол Улсын дээд шүүх Л.Гантөмөрийг АН-ын даргаар бүртгэж авсны дараа тодорхой болох зүйл. Харин одоогоор С.Эрдэнээс томилогдсон өмнөх генсек Г.Өнөрбаяр энэ албан тушаалд ажиллаж байна.
