Ерөнхий сайд Л.Оюун-Эрдэнэ цаг үеийн асуудлаар мэдээлэл хийлээ.

Тэрээр "Жагсагчдаас 20 орчим шаардлага ирсэн байна. Шаардлагыг нэгтгэж үзэхэд 14 иргэний нийгмийн байгууллагууд, 20 орчим бусад шаардлага байгаа юм. Багцлаад үзвэл нэг нь шударга ёстой холбоотой асуудал байна. Хөгжлийн Банкны өр өнөөдөр ингээд төлөгдөж байна. Чингис бонд ч гэсэн. Энэ бол тухайн үед бидний үр хүүхэд төлнө гэдэг байдлаар бонд босгосон. Гадаад өрийн асуудал Монгол Улсын хөгжлийг боомилсон. Хариуцлага тооцох агуулга дээр амаргүй нөхцөл байдлын тэмцэл хийсэн. Эргээд бодвол Оюутолгойн гэрээтэй холбоотой асуудлыг Арбитрт өглөө гэдэг асуудлыг энэ танхимаас зарлаж байсан.

Дубайн гэрээ цуцлагдаж, 2.3 тэрбум өр тэглэгдэх түвшинд хүрч чадах болов уу гэдэгт эргэлзэж байсан. Энэ асуудлыг олон нийт маш сайн дэмжиж, бодит үр дүнд хүрсэн. 34 хувийн асуудал бүрэн шийдэгдэж, гүний уурхай ашиглалтад орох гэж байна. 

Эрдэнэтийн 49 хувь гэдэг том асуудал гарч ирсэн. Анхны схемийг миний хувьд задалж ярьж байсан. Тухайн үед онцгой дэгдэм тогтоох шийдвэрийг гаргаж байсан. Эрдэнэтийн 49 хувь холбоотой шүүхийн асуудлыг нүд цавчилгүй харж байгаа. 

Хөгжлийн Банкны чанаргүй зээлийн асуудал яригдсан. 805 тэрбум төгрөг эргэн төлөгдсөн. Заримдаа гацаад байдаг асуудал олон нийтийн дэмжлэгээр гацаанаас гардаг. Саяхан Тавантолгойтой холбоотой асуудлыг гаргаж тавьсан. Том асуудлууд ихэнх нь цэгцэрч байна" гэлээ. 

Мөн тэрээр "Ерөнхийлөгч УИХ-ыг тараах, Засгийн газрыг огцруулах асуудал яриагүй. Сүүлийн үед хэвлэл мэдээллийн хэрэгслээр Ерөнхийлөгч, Ерөнхий сайд хоёр таарамж муутай, МАН-ын ерөнхий нарийн бичгийн даргаасаа болж зөрчилтэй байна, үе хоорондын зөрчилтэй гэх зэргээр гарч байгаа.  Амарбаясгалан дарга, Хүрэлбаатар сайд бидний дунд ч ийм мэдээллүүд явдаг. Ийм зүйлд төөрөгдөөд байх цаг хугацаа өнгөрчхөж дээ.

Сандраад байгаа зарим нөхдөд хандаж хэлэхэд ийм мэдээнээс болоод бид хэд муудалцаад сүртэй юм болчихгүй. Одооноос үл бүтэх зүйл хийхээ болих хэрэгтэй.

ҮАБЗ өчигдөр хуралдсан. Хурлын үеэр Монгол Улсын Ерөнхийлөгч өөрийн саналаа УИХ-ын даргатай солилцсон. Төрийн тэргүүний хувьд улс төрийн намуудын асуудал, хоёрдугаарт Засгийн газар өөрсдөө шийдэх ёстой асуудал. Нийгмээ сайн тооцох ёстой. Шаардлагатай байвал тогтолцооны реформыг хийх тохиолдолд ард түмэн дэмжвэл би дэмжинэ гэдгийг Ерөнхийлөгч хэлсэн.

Бидний хувьд олон зүйл дээр ойлголцоод явах давуу тал байгаа юм. Дэлхий нийт цар тахалтай, дайн тулаантай ийм үед ҮАБЗ-ийн гурван гишүүн хөгжлийн бодлогыг нэг цонхоор харж чадаж байгаа. Жишээлбэл шинэ төмөр зам 8 сарын дотор тавигдаж болж байгаа юм. Хурдтай ажиллахад энэ нь давуу тал юм байна гэж бодогдсон.

МАН-ын УЗ-ийн гишүүдтэй дээрх асуудлуудыг л ярьсан. УЗ-өөс надад улс төрийн эрх олгосон. Тийм учраас энэ асуудлуудыг аль аль талд нь яриад явна" гэлээ.