УИХ-ын чуулганы өнөөдрийн хуралдаанаар Эрчим хүчний зорилт болон Засгийн газрын үйл ажиллагааны хөтөлбөрт туссан томоохон төсөл, арга хэмжээний хэрэгжилтийн явц, тулгамдаж байгаа асуудалын талаар Эрчим хүчний сайд Б.Чойжилсүрэн танилцууллаа.

Тэрээр "Аргалаад яваад байж болохгүй. Аргалах бүх нөөц шавхагдаж дууссан. Үүнийг ард түмэн, олон нийтэд шударга хэлсэн нь дээр. Улаанбаатар дулааны дөрвөн эх үүсвэртэй. ТЭЦ-2, ТЭЦ-3, ТЭЦ-4, Амгалангийн дулааны станц. Дулааны хувьд ийм. Дутагдаж байгаа тархмал эх үүсвэрийг 2024-2025, 2025-2026, 2026-2027 гэсэн онуудад зургаагаар нэмэгдүүлэх зураг төсөл гарсан. Эхний төслийг эхлүүлсэн. Амгалан дулааны цахилгаан станцыг өргөтгөх төсөлд гүйцэтгэгч нь шалгарсан. Чадвал ирэх өвлөөс өмнө нь холбоно. Улаанбаатар дулааны шугам сүлжээний борлуулж байгаа өртөг нь үйлдвэрлэж буй өртгийнхөө 40 орчим хувьтай байна. Улаанбаатар дулааны сүлжээ ТӨХК энэ онд хүлээгдэж буй дүнгээр 130 орчим тэрбум төгрөгийн борлуулалт хийнэ" гэв.