Ш.Соджавхлан хүү анх төрөхдөө хоёр гарын дунд болон ядам хурууны арьс наалдсан төржээ. Тэрээр “ах нарынхаа хуруу бээлийг би яагаад өмсөж болохгүй байгаа юм бэ” зэргээр эмзэглэх зүйлс гарч эхэлсэн байна.
2019 онд БНСУ-ын Инчон хотын захиргаа, Инчон хотын Аялал жуулчлалын газар, Инчон Сонму эмнэлэг хамтран түүний онгоцны зардал болон бусад бүх зардлыг 100 хувь дааж үнэ төлбөргүй мэс засал хийж өгөхөөр болжээ.
Хүү мэс засалд орохоор БНСУ-д ирсэн боловч насны хувьд хэтэрхий бага, нэг нас ч хүрээгүй байсан учир өсөж том болохоор нь мэс засал хийж өгөхөөр болсон байна.
2020 оны 2 дугаар сард дэгдсэн “Ковид-19” халдварын улмаас хүү БНСУ-д ирж чадахгүй байсаар гурван жилийн дараа буюу 2022 онд Өмнөд Солонгос улсад ирж мэс засал хийлгэлээ. Ш.Соджавхлан 2022 оны 10 дугаар сарын 30-нд БНСУ-д ирж, 11 дүгээр сарын 1-ний өдөр мэс засалд орлоо.
Түүний мэс засал дөрвөн цаг үргэлжилж, хурууны наалдсан арьсыг салгаснаас гадна шинээр арьс суулгах мэс засал хийсэн байна. Ш.Соджавхлан хүүгийн мэс засал амжилттай болж эмнэлгээс гарч эмнэлгийн гадуурх эмчилгээ хийлгэжээ. Инчон Сонму эмнэлгийн хамт олон түүнийг Инчон хоттой танилцуулснаас гадна, амьтны хүрээлэн үзүүлж, ирэх жил сургуульд орох бяцхан хүүд хичээлийн хэрэгсэл бэлэглэсэн байна. Хүүд мэс засал гардан хийсэн гэмтэл согогийн эмч Чү Сон Ён “Бяцхан хүүхдийн хувьд хүнд мэс засал ч, маш цоглог хүү учраас амжилттай даван гарлаа. Эх орныхоо ноён нуруу болсон хүүхдэд итгэл найдвар өгч чадсандаа үнэхээр баяртай байна” хэмээсэн юм. Ш.Соджавхлан энэ сарын 24-нд эх орон луугаа буцлаа.
Дашрамд дуулгахад, БНСУ-ын томоохон эмнэлгүүд нийгэмд хүлээсэн хариуцлагынхаа хүрээнд гадны орны өвчтөнд үнэ төлбөргүй мэс засал хийж өгөх явдал түгээмэл байдаг. Инчон Сонму эмнэлгийн зүгээс өнгөрсөн хугацаанд Монгол, Хятад, Орос зэрэг зургаан орны 8 өвчтөнд хүнд болон хөнгөн мэс засал үнэ төлбөргүй хийж өгсөн байна. Цаашид сайн үйлийн аяныг улам өргөжүүлж олон өвчтөн хамрагдах боломж олгохоор зорьж байна хэмээсэн юм.
“Монголын мэдээ” сувгийн БНСУ дахь сурвалжлагч Э.Ижилболд
