Энэ сарын 9-ний өдөр ёслол төгөлдөр нээлтээ хийсэн Тавантолгой-Зүүнбаян чиглэлийн хүнд даацын төмөр замын ачааны галт тэрэг осолдож, унажээ. Осол Зүүнбаян өртөөнөөс 75 км зайтай Хулангийн Шанд гэх газарт болсон байна. Галт тэрэг өнгөрсөн шөнө 23:30 цагийн орчимд хөдөлж, 24:00 цагийн орчимд ослыг бүртгэжээ. Ослын газарт тус аймгийн Онцгой байдлын газрын албан хаагчид ажиллаж байна. Энэ талаар Зам, тээвэр хөгжлийн сайд С.Бямбацогт мэдээлэл хийлээ.
С.Бямбацогт:
-"Урьд шөнө Дорноговь аймгийн Улаанбадрах суманд осол болсон. Зүүнбаян өртөөнөөс Ханги-Мандлын төмөр замын чиглэлд ачаа ачсан "Монголиан транс ложистик" компанийн вагон замаас гарч унасан осол боллоо. Зүүнбаян өртөөнөөс 70 км зайтай Хулангийн Шанд гэх зөрлөгт уг осол гарсан. Өнгөрсөн шөнө 23:30 цагийн орчимд хөдөлж, 24:00 цагийн орчимд уг осол бүртгэгдсэн байна. Нийтдээ цуваанд 17 вагон явж байсан. 14 нь төмөр замын ресс төмөр, гурав нь төмөр замын дэр ачсан байсан байна. Ханги-Мандлын төмөр замын бүтээн байгуулалтыг барьж буй ачаа байсан. Ачсан ачаатай вагон замаас гарч унасан. Вагонд гурван хүн зорчиж байсан. Биеийн байдал гайгүй, хүний амь нас эрсдээгүй. Ослын шалтгааныг газар дээр нь тодруулсан. Урьдчилсан байдлаар вагон хурд хэтрүүлсний улмаас замаас гарсан байх гэсэн дүгнэлт гарсан. Вагоны машинист мөн согтуу байсан гэх мэдээлэл ирж байна. Энэ асуудлыг цагдаагийн байгууллага шалгаж байгаа.
Вагонд байсан хоёр хүний согтолтын зэрэг нэг бүхлээс дээш гарсан. Төмөр зам чанаргүй болсноос гэдэг зүйл яригдаагүй байна. Зүүнбаян-Тавантолгой чиглэлийн төмөр замыг Монголчууд өөрсдөө барьсан. Энэ ондоо багтаагаад улсын комисс хүлээн авна. Одоогоор туршилтын тээвэр хийгдэж байна. Нэмэлт мэдээлэл өгөхөд төмөр замын салбар олон төмөр замтай болсон. Хуучин ганцхан Улаанбаатар төмөр замтай байсан бол, Монголын төмөр зам, Зүүнбаян төмөр зам, Тавантолгой, “Монголын транс ложистик” төмөр зам гэх олон төмөр зам бий болсон. Эдгээр төмөр замыг нэгдсэн удирдлага зохион байгуулалтаар хангах шаардлага гарч буй. Тухайлбал, Монголын төмөр зам төрийн өмчит бодлого зохицуулалтын газар харьяалагддаг. Зүүн баян-Тавантолгой төмөр зам Уул уурхайн яам буюу “Эрдэнэс таван толгой”-н харьялалд байдаг гэх мэт төмөр замын бодлого, нэгдсэн зохион байгуулалт алдагдсанаар сахилга дэг журам, хариуцлагын тогтолцоо алдагджээ. Цаашдаа аюулгүй байдалд анхаарч ажиллах ёстой" гэв.
