Төрийн байгуулалтын байнгын хорооны пүрэв гаригийн хуралдаанаар Үндэсний баяр наадмын тухай хуулийн төслийн хэлэлцүүлгийг хийлээ.

Энэ үеэр УИХ-ын гишүүн Д.Тогтохсүрэн "Монголын ард түмэн үзүүрлэсэн бөхөд цол өгдөггүй. Түрүүлсэн бөх нь манлайлж явдаг. Гэтэл үзүүрлэчихээд бүгд цол авах нь. Ийм юм хэзээ ч байж болохгүй.

Ес давж түрүүлсэн арслан цолтой бөх аварга, ес давж түрүүлсэн улсын арслан цолтой бөх арав давах юм бол даян аварга болж байгаа юм. Харин аварга цолтой бөх ес давж үзүүрлэх юм бол даян аварга, даян аварга цолтой бөх ес давж үзүүрлэх юм бол дархан аварга болно гэж байна. Ингэж болохгүй ээ. Жишээ нь, Д.Цэрэнтогтох дархан аварга дөрөв түрүүлж, тав үзүүрлэсэн. Тав үзүүрлэхдээ нэг ч цол аваагүй. Гэтэл одоо үзүүрлэсэн бөхчүүд цол авдаг болох нь. Бид ийм юм хийж болохгүй. Нэг л зарчим үйлчлэх ёстой. Ингэж хүнд зориулж, барилдааны амжилтыг бууруулж болохгүй. Үүнийг Х.Баянмөнх гуай эрс эсэргүүцнэ. Яагаад гэвэл би олон үзүүрлэсэн хүн. Түрүүлээгүй хүнд цол өгдөг болж байгаа юм уу гээд л эхэлнэ" гэв. 

Түүнийг байр сууриа илэрхийлсний дараа Монголын үндэсний бөхийн холбооны ерөнхийлөгч Ц.Магалжав "1,024 бөх барилддаг болоод эхлэхээр үзүүрлэсэн бөхөд цол өгдөх болохоор өөр аргагүй юм билээ. Өмнөх түүхэн уламжлалын тухайд Ардын хувьсгалын 40 жилийн ойгоор 512 бөх барилдахад С.Цэрэн аварга начин цолтой түрүүлээд улсын аварга, дараагийн 10 жилд нь үзүүрлээд даян аварга болж байсан. Мөн Д.Цэрэнтогтох аварга 1981 онд үзүүрлээд дархан аварга болж байсан. Жил болгон 512 бөх барилддаг байсан бол Д.Тогтохсүрэн гишүүний хэлдэг зөв. Гэтэл 1,024 бөх барилдахаар есийн даваа нь цолны даваа болж байгаа юм" хэмээн хариулав. 

Харин УИХ-ын гишүүн Д.Тогтохсүрэн "Энэ хуулийн төсөл дэмжигдээд батлагдлаа гэхэд ард түмэн асар их шүүмжилнэ. Хүнд зориулсан ийм хууль баталж болохгүй. Жишээ нь, О.Балжинням аварга нэг түрүүлж, нэг үзүүрлэж байсан болохоор даян аварга бол өгөх гэж байна. Гэтэл хоёр түрүүлсэн П.Бүрэнтөгс аварга цолтой л байгаа. Нэг түрүүлж, 3-4 үзүүрлэсэн Д.Сумъяабазарт даян аварга цол өгөх гэж байна. Ард түмэн барьж иднэ дээ. Хамгийн гол нь энэ хуулийг эргэж үйлчилнэ гэж байна. Хуулийг эргэж үйлчлүүлж төрийн нэр хүндийг унагааж болохгүй" гэлээ.