Цэргийн төв эмнэлгийн Цээж хэвлийн мэс заслын сувилагч, ахлагч Ж.Атартуяа

Хүний бүдүүн гэдсэнд залгаатай байдаг мухар олгой нь бие организмд ямар үүрэгтэй болохыг эрдэмтэд одоо хэр нь тайлж чадаагүй байна.Заримдаа мухар олгой нь хурцаар үрэвсэж, мэс заслын аргаар тайрч авахад хүрдэг. Тиймээс эрдэмтэд мухар олгойг ашиггүй, илүүдэл эрхтэн гэж үздэг байв.

Гэвч АНУ-ын Аризона Мужийн Мидвестерн Их сургуулийн судлаачид “мухар олгой нь хүний биеийн дархлаанд чухал үүрэгтэй эрхтэн” гэдэг дүгнэлтэд хүрчээ. Мухар олгойтой амьтдын гэдэс доторт лимфоидын эд эс гэгддэг дархлааны системийн чухал элементүүд илүү олон байсан гэнэ.

Эдгээр нь хүний биед ашиг тустай бактеруудыг өсгөж өгдөг ба тэдгээр бактерууд нь мухар олгойнд нөөцлөгддөг аж. Суулгах үед хүн гэдэснээсээ ашигтай бактериа алддаг бол мухар олгой түүнийг нь даруй нөхөн сэргээж өгдөг байна. Тиймээс мухар олгойгоо авахуулсан хүмүүс суулгалтын дараа бие нь эрүүлжиж, эргэн сэргэхдээ удаан байдаг гэнэ.

Насанд хүрсэн хүний мухар олгойн дундаж хэмжээ 5-10 см урт, 6-8 мм диаметртэй байдаг ажээ.

Мухар олгойн мэс засал эмчилгээ хийлгэсний дараах хоолны дэглэм: 

• Хуурсан, шарсан хоолноос татгалзаж чанаж, жигнэсэн хоол идэх
• Хэт хүйтэн, эсвэл хэт халуун цай, хоол идэхгүй байх
• Давсны хэрэглээг багасгах
• Өдөрт бага багаар, ойрхон ойрхон 5-6 удаа хооллох
• Амьтны гаралтай өөх тосноос татгалзаж, ургамлын тос, оливын тос зэрэг биед түргэн шингэдэг тосыг сонгож хэрэглэхийг зөвлөж байна.