Коммунист намын дээд албан тушаалтныг бэлгийн хүчирхийлэл үйлдсэн хэмээн мэдэгдснээс хойш чимээ тасарсан Хятадын теннисчин Пэн Шуайд АНУ "маш их санаа зовниж" байгаагаа мэдэгдэв.

Цагаан ордон теннисчин Пэнгийн хаана байгаа болон аюулгүй байдлын талаар Хятадаас "бие даасан, нотлох баримтыг гаргаж өгөхийг" уриалсан байна.

Өдгөө 35 настай "Их дуулга"-ын хошой аварга теннисчин Пэн хоёр долоо хоногийн өмнө Хятадын Ерөнхий сайдын экс дэд сайдыг бэлгийн хүчирхийлэл үйлдсэн хэмээн буруутгасан юм.

Одоогоор Эмэгтэйчүүдийн теннисний холбоо Хятад улсад болох тэмцээнүүдийг цуцална хэмээн сүрдүүлээд байна.

Дэлхийн теннисийн холбооны дарга Стив Саймон BBC-д ярихдаа, теннисчин Пэнг аюулгүй байгаа гэдгийг нотлох баримтгүйгээр ирэх жил Хятадад тэмцээн зохион байгуулахгүй.

"Бид буулт хийж чадахгүй. Энэ бол зөв, буруу гэж маргах асуудал биш" гэж хэллээ.

Дэлхийн теннисийн холбоонд Пэнг аюулгүй гэж Бээжин дэх Хятадын теннисний холбооноос мэдэгдсэн ч Стив Саймон энэ нь үнэн болохыг нотлоогүй гэж мэдэгдлээ.

Баасан гаригт гарсан өөр нэгэн мэдээгээр Пэнгийн гурван зургийг түүний нэрээр WeChat дансанд "Амралтын өдрийн мэнд хүргэе" гэсэн тайлбартайгаар нийтэлсэн байна.

Гэсэн хэдий ч Хятадын шуурхай мессенжер дээрх нийтлэлийн жинхэнэ эсэхийг BBC China-гийн хэвлэл мэдээллийн шинжээч Керри Аллен эргэлзсэн байна.

Энэ долоо хоногийн эхээр Хятадын төрийн хэвлэлүүд хатагтай Пэнтэй холбоотой цахим шуудан нийтэлсэн боловч Стив Саймон түүний үнэн эсэхэд эргэлзэж байгаагаа мөн хэлсэн байна.

Энэ сарын 2-нд Хятадын нийгмийн сүлжээний Weibo сайтад Ерөнхий сайдын орлогч асан Жан Гаолигийн талаарх мэдээллийг нийтэлснээс хойш Пэн олны өмнө гараагүй.

Тэрээр 2013-2018 оны хооронд тус улсын дэд ерөнхий сайдын албыг хашиж байсан Жантай бэлгийн харилцаанд "хүчээр орсон" гэж мэдэгдсэн юм.

500,000 гаруй дагагчтай түүний аккуантны сүүлийн үеийн бусад нийтлэл болон бусад бүх мэдээллийн хамт хэдхэн минутын дараа устгасан байдаг.

Тэр цагаас хойш теннисний ертөнцөөс улам олон тэргүүлэх дуу хоолой Пэнгийн тухай ярих болсон юм.

Эмэгтэйчүүдийн дэлхийн чансааны тэргүүн асан, "Их дуулга"-ын 23 удаагийн аварга Серена Уильямс хатагтай Пэнг алга болсон тухай мэдээ түүнийг "шоконд оруулсан" гэжээ.

Тэрээр "Түүнийг эсэн мэнд, аль болох хурдан олоосой гэж найдаж байна. Бид чимээгүй байж болохгүй, заавал шалгах хэрэгтэй" гэж твиттер хуудсандаа бичжээ.

Дэлхийн номер эрэгтэй теннисчин Новак Жокович шоконд орсон гэж хэлсэн бол Наоми Осака мөн түүний хаана байгаа талаар санаа зовж байгаагаа илэрхийлжээ.

Теннисчид болон сошиал сүлжээний хэрэглэгчид #WhereIsPengShuai гэсэн хаштаг дор жиргэж байна.

Пэн бол Хятадын теннисний нэр хүндтэй тамирчин юм. Түүний энэ мэдэгдэл нь Хятадад шинээр гарч ирж буй #MeToo хөдөлгөөний хамгийн алдартай хэрэг болоод байна.

Б.Бүжлхамаа

www.bbc.com