Монгол Улсын их сургууль болон Монголын Үндэсний их сургуулийн нэрний давхцалын асуудал иргэдийг төөрөгдүүлж байгаа тул МҮИС гэх нэрийг буцаан авна гэж салбарын сайд Л.Энх-Амгалан мэдэгдэж байв. Үүний дараа Монголын Үндэсний их сургуулийн зүгээс хуулийн дагуу энэ асуудлыг шийдүүлхээ ирэлхийлж сайд Л.Энх-Амгаланг уучлалт гуйхыг шаардсан байдаг.

Тэгвэл өнөөдөр БШУ-ы сайд Л.Энх-Амгалан уг асуудалтай холбоотойгоор мөрдөн байцаагчид мэдүүлэг өгсөн талаараа цахим орчинд дахин бичжээ.

Тэрээр "Тухайн үеийн Боловсролын сайдын 1992 оны оны аравдугаар сарын 26-ны өдрийн “Үндэсний их сургуулийн статус олгох тухай” 476 дугаар тушаалаар Монгол Улсын Их сургуулийг “Монгол Улсын Үндэсний Их сургууль” хэмээн нэрлэсүгэй” гэж статусыг МУИС-д албан ёсоор олгосон.

Энэ нэр бол Монгол Улсын оюуны өмчийн газар, Монгол Улсын Төрийн хэлний зөвлөл, Шударга өрсөлдөөнийг зохицуулах газруудаар баталгаажсан, МУИС-ийн өмч юм.

Би Боловсрол, шинжлэх ухааны сайдаар ажиллах хугацаандаа Монгол Улсын Их сургуулийн нэрний давхардлыг арилгах асуудлыг хуулийн хүрээнд шийдүүлж, удахгүй нэг талд нь гаргана.

Би Монголын Үндэсний Их сургууль гэдэг тухайн байгууллагын нэр хүндэд халдаж буруутгаагүй. Хууль бусаар авсан нэрийг ашиглан ашиг орлого олох хэрэгсэл болгож байгааг буруутгасан. Дээр нь МУИС-ийн оюуны өмч болох нэрийг нь давхардуулж олгосон тухайн үеийн Боловсролын яамны албан тушаалтнууд, Улсын бүртгэлийн газрыг буруутгаж байгаа юм.

Нэрийн давхардал үүссэн нь оюуны өмчийн хулгай байна гэж хэлсэн минь үнэн. Түүнээс биш хэн нэгнийг хулгай хийсэн, хулгайч гэж хэлээгүй. Би ямар нэгэн хууль бус үйлдэл, буруу зүйл хийгээгүй учраас хэн нэгнээс уучлалт гуйх шаардлагагүй" гэжээ.