Сангийн сайд Б.Жавхлан өнөөдөр хэвлэлд өгсөн мэдээлэлдээ "Засгийн газар НӨАТ-ын сугалааг болиулах саналыг огт дэмжихгүй. Хоёр хувийн буцаан олголтыг тэглэх ёстой. Буцаан олголт байх ёсгүй. Нэгэнт л НӨАТ-ын татвар бол бүртгэлийн шинжтэй татвар шүү дээ. Далд эдийн засгийг ил гаргах зүйл. Тэгэхээр энэ татварыг цаашид сайн хөгжүүлэх хэрэгтэй. Эсрэгээрээ буцаан олголтыг тэг болгох хэрэгтэй" хэмээсэн байв.
Энэ нь иргэдийн дунд маргаан дагуулж, Н.Алтанхуягийн Засгийн газрын авч хэрэгжүүлсэн энэ ажлын үр дүнд татварын орлого хэд дахин өссөнийг онцолж, НӨАТ-ын буцаан олголт байхгүй бол татварын орлого буурах талтайг онцлов.
Тэгвэл Сангийн сайд Б.Жавхлан энэ талаар тайлбар хийжээ.
Тэрээр "НӨАТ-ын буцаан олголтыг зогсоох тухай асуудал огт яригдаагүй. Ойрын жилүүдэд НӨАТ-ын татвар 10 хувь, буцаан олголт хоёр хувь хэвээрээ байна. Харин хоёр хувийг нэмэгдүүлэх үү гэж их асууж байна. Ойрын хугацаанд ямар ч нэмэгдүүлэх бодлого байхгүй. НӨАТ-ын 10 хувийн татварыг бусад оронтой харьцуулахад манайх багадаа ордог. Мөн хоёр хөрш нэг нь 16, нөгөөх нь 20 хувь байдаг. НӨАТ хамрагдалт 2017 онд 45 хувь байсан бол өнөөдөр татвар төлөлт 67 хувьд хүрсэн. Энэ хувь хэмжээ 80-90 хувьд хүрч, далд эдийн засаг 10 хувьд хүрч агштал НӨАТ-ын буцаан олголтыг багасгах, бууруулах талаар яригдахгүй" гэлээ.
