Өөрсдийгөө "улс төрийн гуравдагч хүч" хэмээн зарлаж, шинэ сонголт амлан гарч ирдэг жижиг намууд ээлж дараалан тараа таниулсаар байна.

Байгуулагдаад арав гаруй жил болохдоо олз хайсан олон хүний гар дамжсан ХҮН /Хөдөлмөрийн үндэсний нам/ өнгөрсөн УИХ-ын сонгуулиар МСДН болон Зүй ёс намтай хамтарч "Зөв хүн Электорат" эвслийг байгуулснаар анх удаагаа парламентад нэг суудал авсан билээ.

Гэвч ХҮН-ын дарга асан Т.Доржханд УИХ-ын гишүүнээр сонгогдсон цагаасаа эхлэн намынхаа нэрээр бизнес хийж эхэлсэн. Жилийн өмнө болсон орон нутгийн сонгуулиар нийслэлд авсан нэг суудлаа арилжиж МАН-ын бүлэгт орсон ХҮН-ынхан энэ удаагийн нөхөн сонгуулиар ч бас МАН-д ажиллаж байна.

Бүр тодорхой хэлбэл, МАН-аас нэр дэвшсэн МАХН-ын дарга Н.Энхбаярын хүү Н.Батшугар, "Зөв хүн Электорат" эвслээс нэр дэвшсэн ХҮН-ын дарга Б.Найдалаа нар сонгуулийн нэг штабаар ажиллаж байгаа юм байна. Сурталчилгаандаа явуулахаар түрээсэлсэн машинуудаа хүртэл нэг компаниас, нэг дор авчээ. Нэр дэвшигчдийн зургийг буулгасан анонсны өнгөнөөс өөр ялгарах зүйл алга.

Уг нь Сонгинын 28-р тойрогт есөн нам, нэг эвсэл өрсөлдөж байгаа. Гэвч үнэн хэрэгтээ найман нам, нэг эвсэл нийлээд ганц Э.Бат-Үүлтэй өрсөлдөж байна. Манай улс төрийн жижиг намуудын мөнгө хийдэг ганц "сезон" нь сонгууль. Эрх баригч намаас мөнгө авч нэр дэвшүүлсэн болоод өрсөлдөгчийнх нь саналыг хувааж, МАН-ын нэр дэвшигчийг гаргах үүрэг хүлээдэг.

Тэгэхээр энэ удаагийн сонгууль Э.Бат-үүлийн хувьд жинхэнэ хүч тэнцэргүй тулаан болж байна. Гэвч зусар ихэдвэл зуд болно гэж үгтэй. МАН-ын энэ их хэтийдсэн бяр чадал, хүч түрсэн улайрал юунд л хүргэх бол доо!!!