Монгол Улсын гавьяат тамирчин Э.Цэндбаатар өчигдөр Дэлхийн аварга шалгаруулах тэмцээнд явах хүсэлтээ албан ёсоор МҮОХ-нд хүргүүлсэн билээ.

Энэ үеэр тэрээр “Би өнөөдөр МҮОХ-нд албан ёсоор ДАШТ-д оролцох хүсэлтээ өгч байна. Хамгийн эхэнд бодогдож байгаа зүйл гэвэл олимпод хожигдол хүлээсэн ОХУ-ын тамирчныг хожмоор байна. Энэ удаагийнх миний хамгийн сүүлийн Дэлхийн аварга шалгаруулах тэмцээн байж магадгүй. Би одоо 25 настай. Боксын тамирчны карьер 30 хүрээд л дуусдаг. Тиймээс үүнд заавал оролцож, Монголынхоо нэрийг гаргаж, ард түмнээ баярлуулахыг хүсэж байна.

Би 60 кг-ийн үндсэн жиндээ заавал оролцох хүсэлтэй байна. Тэр рингэн дээр ялагч нь байхыг зорьж, хүсч байна. Намайг Дэлхийн аварга шалгаруулах тэмцээнд явуулах бүх боломжоор хангаж өгөхийг хүсэж байна. 

Хэрвээ би энэ тэмцээнд орж чадахгүй бол маш их харамсана. Олимпоор олон хүний сэтгэлийг гонсойлгосон. Дэлхийн аварга шалгаруулах тэмцээнд бүх хүчээ дайчлахын тулд эцсээ хүртэл тэмцэнэ.

Цаашид мэргэжлийн бокс руу эргэж буцахгүйгээр орох болно. Дэмжиж байгаа нийт ард түмэндээ баярлалаа. О.Тулга бид хоёр ард түмний өмнө тулалдаж, хэн ялсан нь Дэлхийн аварга шалгаруулах тэмцээн рүү явья” гэсэн юм.

О.Тулгын хувьд Залуучуудын Азийн аварга шалгаруулах тэмцээний хүрэл медальтай. Энэ жил 21 нас хүрч байгаа “Алдар" спорт хороонд харьяалагддаг тамирчин юм.

Дашрамд, Монголын боксын холбоо ерөнхийлөгчөө сонгосон орой гавьяат тамирчин Э.Цэндбаатар хүнд жинд тоглож байсан тамирчин гэх хоёр этгээдэд зодуулсан хэрэг гарсан. Үүний дараа Монголын боксын холбооны удирдах зөвлөл Э.Цэндбаатарыг “Согтууруулах ундаа хэрэглэсэн” гэх үндэслэлээр шигшээ багаас хассанаа олон нийтэд танилцуулсан билээ. Гэхдээ тэрээр уг шийдвэрийг хүндэтгэж байгаа ч дэлхийн аваргад оролцох хүсэлтэй байгаагаа ийнхүү илэрхийлсэн юм.