Баянзүрх дүүргийн 4-р хорооны нутаг дэвсгэрт орших Г.К.Жуковын талбайд барилгын ажил эхлүүлснийг эсэргүүцэж иргэд амралтын өдөр жагссан билээ. Иргэдийн зүгээс тус газрын эзэмшлийг цуцлан нийтийн эзэмшлийн талбай болгохыг хотын захиргаанаас шаардаж байгаа юм.
Тэгвэл Засгийн газрын өнөөдрийн хуралдаанаар дээрх асуудал асуудал яригдсан бөгөөд Ерөнхий сайд Хотын даргад хугацаатай үүрэг өгчээ.
Энэ талаар Засгийн газрын Хэвлэл мэдээлэл, олон нийттэй харилцах хэлтсийн контент боловсруулах хэлтсийн дарга О.Бямбагэрэл “2021 оны Зургадугаар сарын 1-ний ээлжит бус хуралдаанаар Ерөнхий сайд хотын даргад Жуковын талбайн газар буюу БЗД-ийн 4-р хороонд байрладаг газрыг чөлөөлөх үүргийг өгсөн. Тодруулбал, ААН-д өгөгдсөн газар эзэмших зөвшөөрлийг нь цуцлаад нийтийн эдэлбэр газар болгон тохижуулахыг Нийслэлийн Засаг дарга Д.Сумъяабазарт үүрэг болгосон байсан.
Өнөөдрийн Засгийн газрын хуралдаанаар энэ газрын асуудлыг шалгаж үзээд дахин танилцуулах үүргийг хотын даргад өглөө. Өөрөөр хэлбэл, шаардлагатай бол хууль хяналтын байгууллагаар асуудлыг шалгуулах боломжтой гэж ойлгож болно. Засгийн газрын хуралдаанд энэ асуудлыг дахин танилцуулна” гэлээ.
