МҮОХ-ны ерөнхийлөгч Н.Түвшинбаярыг МУ-ын Ерөнхий сайдын зөвлөхөөр томиллоо. 2021.02.15

Ерөнхий сайд Л.Оюун-Эрдэнийн зөвлөх, МУ-ын хөдөлмөрийн баатар, Олимпийн аварга Н.Түвшинбаяр өөрийн багын найз, бэлтгэл хангагч асан Улсын өсөх идэр начин Э.Энхбатыг согтуу үедээ хэрцгийгээр зодож, амь насанд нь халтай гэмтэл учруулснаас хойш дөрөв хоног өнгөрөв. Ар дагз, дух нь цөмөрч, тархиндаа хүнд гэмтэл авсан Э.Энхбатын биеийн байдал хүнд, ухаан оройгүй, комын байдалтай дөрөв хонож байна. 

Болсон явдлыг Э.Энхбатын эхнэр анх мэдээлсэн бөгөөд харин олимпийн аварга Н.Түвшинбаярын хувьд маргааш өдөр нь хөнгөн хэлбэрийн гэмтэл авсан, Интермед эмнэлэгт эмчлүүлж байгаа гэдэг мэдээллийг цацсан билээ.

Цагдаагийн байгууллага түүнээс өчигдөр анхны мэдүүлгийг авсан бөгөөд түүний гэм буруутай нь тогтоогдвол 40 сая төгрөгийн торгууль төлөх, эсвэл 2-8 жилийн хорих ял шийтгэх боломжтой тухай мэдээлэл цацагдаад байгаа. Н.Түвшинбаярын хувьд өчигдөр өгсөн мэдүүлэгтээ "Маш их согтолттой байсан учир юу болсныг санахгүй байна" гэж мэдүүлсэн. Өөрөөр хэлбэл, түүний гэм бурууг зөвхөн хамт байсан гэрч нарын мэдүүлгээр нотолно гэсэн үг. Тийм болохоор хэрэг явдал яаж шийдэгдэхийг таамаглахад бэрхтэй. 

Тодорхой байгаа ганц зүйл бол Найдангийн Түвшинбаяр нь Монгол Улсын нэр төрийг өндөрт өргөж, олимпийн алт, мөнгөн медалийг эх орондоо авчирсан хүн. Тэр хэрээр төр, ард түмний хүндлэлийг олж, МУ-ын хөдөлмөрийн баатар цол, Чингис хааны одонгоор шагнасан. Тиймээс энэ удаагийн өдүүлсэн хэрэг /өмнө нь ч бас цэв цэвэрхэн байгаагүй гэсэн үг/ нь төр, түмний хүндлэлийг уландаа гишгэсэн үйлдэл, хүний мөс чанар, тамирчин хүний ёс зүйд байж боломжгүй зүйл хэмээн үзэж, нийтээрээ буруушаан Хөдөлмөрийн баатар цол, Чингис хааны одонг нь буцаах хэрэгтэй хэмээн шаардаж байгаа.

Гэвч харамсалтай нь Үндэсний олимпийн хороо, Жудо бөхийн холбооноос өнөөдрийг болтол ямар нэг тайлбар, мэдэгдэл, байр суурь илэрхийлээгүй хэвээр байна. Тиймээс түүнийг МУ-ын Ерөнхий сайдын зөвлөх гэдэг улс төрийн өндөр албан тушаалд томилсон Ерөнхий сайд Л.Оюун-Эрдэнэ ядаж Н.Түвшинбаярын өмнөөс ард түмнээсээ уулчлал гуйх нь төрийн ёс зүйд нийцнэ. Манайхаас өөр оронд бол аль хэдийн уучлал гуйгаад ажлаас нь чөлөөлчихсөн байгаа. Тэр байтугай тамирчных нь эрхийг хасаад дэвжээнээс буулгах хатуу ёс зүй, дэг журам үйлчилдэг.

Харин Н.Түвшинбаярын хувьд Жудо бөхийн холбооны ерөнхийлөгч Х.Баттулгын хатуу чанд хамгаалалт саад хийгээд байна уу, эсвэл Л.Оюун-Эрдэнэ сайдын хэнэггүй, цөлх зантай холбоотой юу? гэдэг нь тодорхойгүй.