Монгол улсын Шадар сайдын эхнэр Ч.Ичинхорлоо улаан бүс буюу ХӨСҮТ-д нэвтрээд хоёр цаг болсны дараагаар гэртээ буцаж харьсан тухай мэдээлэл гарсан. Энэ үйлдэл гамшгийн үеийн хатуу дэглэмийг зөрчсөн байж болзошгүй асуудал олон нийтийг бухидуулж, Шадар сайдын хариуцлага хүлээх ёстой хэмээж байна.

Энэ үйлдлийн Шадар сайд С.Амарсайхан тайлбар хийдээ "Би цар тахалтай тэмцэж байгаа. Үүнийг даван туулахын тулд хэн хэндээ дэмжлэг үзүүлж, дүрэм журмаа мөрдөж явах ёстой. Би хэн нэгнийг зөвтгөх, эсвэл буруутгах гээгүй. Цар тахалтай тэмцэхийн тулд чадах бүхнээ хийж бүх цагаа зориулж байна. Манай гэр бүлийн хүн айлын эхнэр, айлын охин хувьд хийдэг бүхнийг хийж, өөрөө эрсдэлд ороод явж байна. Залуустаа хандаж хэлэхэд цар тахлын үед дэглэмээ сайтар бариарай" гэсэн юм.

Уг тайлбар олон нийтийн бухимдуулж, эрх мэдэлтэн, түүний хамаарал бүхий хүмүүст цар тахлын үеийн дэглэм үйлчилдэггүй гэдгийг харууллаа. 

Хэрвээ та бүхэн санаж байвал халдвар хамгааллын дэглэм зөрчсөн гэж энгийн иргэдийг баривчлах, торгууль ноогдуулах, зарим нэгийг нь зөгий, эрвээхий барьж буй мэт холын зайнаас харьцаж уурга ашиглаж байсан. Хамгийн сүүлд болсон хүндхэн жишээ гэвэл халдвартай нь тогтоогдсон иргэнийг 20 км газар машинаар туусан явдал.

Иргэдэд ялгавартай хандаж буй үйл явдлуудын талаар Хуульч Х.Тэмүүжин өөрийн байр сууриа цахим хуудаснаа илэрхийлжээ. 

Тэрээр "Хаа сайгүй дабл стандарт. Хорио цээр хариуцсан сайдын эхнэрт тэр даргын хариуцсан хорио цээр үйлчилсэнгүй. Халдварт өвчнөөр шалтгаалан иргэдэд хатуу үйлчилж буй дүрэм журмыг даргын эхнэр зөрчөөд, юу ч болоогүй юм шиг бусдаар өмөөрүүлэн, энэрэлт охины дүрд орох! Зарим нэг нь манай даргын эхнэр бол "ээж, аавыгаа гэх сэтгэлтэй мундаг ёс зүйтэй хүн" гэж өмөөрөх!

Тэдгээр хүмүүс энэ үгээ тэнгэрт хальж буй аавтайгаа уулзаж чадаагүй эмэгтэй, үхлүүт өвчтэй охинтойгоо уулзаж чадаагүй эх, хавдартай ээжтэйгээ уулзаж чадаагүй жаахан охин гээд хууль журмын өмнө хүч мөхөсдсөн жирийн иргэдэд хэлээд үз дээ. Даргын эхнэрт үйлчилдэггүй хорио цээрийг жирийн иргэд яагаад дагах ёстой гэж.

Иргэдэд цагдаагийн хүчирхийллээр мөрдүүлчихээд эхнэртэй мөрдүүлж чадахгүй албан тушаалтан одоо яаж хорио цээр мөрдүүлж, иргэдэд шаардлага тавих уу? Миний гаргасан шийдвэр, тушаал манай гэр бүлд хамаагүй ээ, та нарт л хамаатай гээд ширэн нүүрэлсээр байх уу?! Ийм увайгүй, эрх мэдлээ эхнэр хүүхэддээ ашиглуулдаг, хуульд нүх гаргаж, ар өврийн хаалгаар ах дүүгээ гоожуулдаг үзэгдлийг авлига гэдэг. Ардчилалд хамгийн аюултай, хүний эрхэд хор хөнөөлтэй, хууль ёсонд халгаатай зүйл. Хариуцлага тооцох л ёстой!" гэсэн байна.