Бүх нийтийн бэлэн байдлын зарласан энэ үед зайлшгүй ажиллах шаардлагатай 13 салбараас гадна хүүхэд хамгаалал болон банкны салбарыг нэмэгдүүлж, нийт 15 салбарын автомашинууд QR бүхий тусгай зөвшөөрөл авч замын хөдөлгөөнд оролцох эрхтэй байгаа. Харин зөвшөөрөгдсөн чиглэлээс бусад чиглэл болон иргэдийн автомашинаар зорчих эрх хязгаарлагдаж байгаа юм.

Энэ талаар Нийслэлийн Засаг даргын орлогч Ж.Сандагсүрэн “Урьдын адилаар 15 зөвшөөрөгдсөн чиглэлээс бусад иргэдийн автомашинаар зорчих эрх хязгаарлагдана. Өнгөрсөн хугацаанд энэ чиглэлд явдаг нийт 23,902 автомашиныг бүртгэлжүүлсэн. Үүн дээр нэмээд хүүхэд хамгааллын чиглэл болон төрийн захиргааны зарим байгууллагын ажилтанд QR код олгоно” хэмээн мэдээлж байсан юм.

Тэгвэл дээрх байгууллагуудын зүгээс 50 мянга гаруй автомашинд зөвшөөрөл авах хүсэлт ирүүлснээс 30 мянган автомашинд зөвшөөрөл өгөөд байгаа аж. Гэтэл эдгээр зөвшөөрлийг НЗДТГ-ын нэр бүхий албан тушаалтнууд бусдад бэлэглэсэн, худалдсан гэх хэрэг гарч, албаныхан шалгалтын ажиллагаа явуулж эхэлжээ.

Шалгалтын явцад, тусгай чиг үүргийн байгууллагын нэр дээр гаргасан QR кодыг тус газарт ажилладаггүй, хамааралгүй этгээдүүд ашиглан, замын хөдөлгөөнд оролцож байсан хэд хэдэн тохиолдлыг илрүүлжээ.

Тухайлбал, жүжигчин А.Ганчимэг нь Харилцаа холбоо мэдээлэл технологийн газрын нэр дээр QR код авч, автомашинаараа хөдөлгөөнд оролцож байсан нь тогтоогджээ. Одоогоор шалгалтын ажиллагаа үргэлжилж байгаа ба  QR эзэмшиж байгаа иргэдийг тухайн байгууллагад харьяалагддаг эсэхийг нягтлан шалгаж байгаа ажээ.