Эрүүл мэндийн яамнаас коронавируст халдварын нөхцөл байдлын талаарх мэдээлэл хийлээ.
ХӨСҮТ-ийн Тандалт, судалгааны албаны дарга А.Амбасэлмаа “Арванхоёрдугаар сарын 2-ны өдөр улсын хэмжээнд нийт 16,599 хүнд коронавирус илрүүлэх PCR шинжилгээ хийсэн. Үүнээс 599 нь хавьтлуудын шинжилгээ бол 16,000 нь орон нутаг руу явахаар шинжилгээ өгсөн иргэдийнх байна.
Орон нутаг руу явах иргэдийн шинжилгээнээс коронавирус илрээгүй. Харин хавьтлын шинжилгээнээс улсын хэмжээнд долоон хүнд коронавирус илэрлээ.
Ингэснээр Монгол Улсад бүртгэгдсэн халдварын нийт тохиолдол 819 боллоо. Өнөөдрийн байдлаар 365 хүн эдгэрээд байгаа бол ХӨСҮТ, Цэргийн төв эмнэлэгт 445 батлагдсан тохиолдол эмчлэгдэж байна" гэлээ.
Мөн тэрээр “Өчигдрийн мэдээллийн үеэр ташаа мэдээлэл хэлсэндээ хүлцэл өчье.
Коронавирусийн халдвар авсан ХӨСҮТ-ийн 11 эмч, сувилагч 14 хоног эмчилгээ, үйлчилгээгээ явуулаад тусгаарлагдаж ажиглалт тандалтын 14 хоногт шилждэг. Энэ тоотой андуурагдаж халдвар аваад эмчлэгдэж байгаа 11 хүнийг эдгэрсэн гэж ташаа хэлсэн байна.
ХӨСҮТ-ийн 11 эмч, ажилчин эмчлэгдэж байгаа бөгөөд бүгдийнх нь биеийн байдал сайжирч байна.
Өнгөрсөн 24 цагт ХӨСҮТ-ийн Халдвартын клиникээс долоон хүн эдгэрч, дараагийн шатны ажиглалт руу шилжлээ. Ингээд өнөөдрийн байдлаар Монгол Улсад батлагдсан нийт 819 тохиолдлоос 365 хүн эдгэрээд байна" гэлээ.
