Засгийн газрын хуралдааны дараа Ерөнхий сайд У.Хүрэлсүх мэдээлэл хийв.

Тэрээр "Цар тахлын үед хүмүүсийн амьдрал хүнд байна. ААН-үүд хорионд ороод зогсож байна. Түлшний асуудал хүнд байна. Айл өрхүүд өдөр бүр гал түлж байна. Бид түлшээр хангах зайлшгүй шаардлага байгаа. Улаанбаатрын хэмжээнд 220 гаруй мянган өрх байгаа. Үүн дээр хөдөө орон нутгаас ирсэн оюутнууд айлын хашаанд гэр бариад амьдардаг. Бас орон нутгаас иргэд ч ирж өвөлждөг. Ингээд 240-250 мянган өрх гэрт гал тулж амьдарч байна. Иймээс бид ард иргэдийнхээ амьдралд тодорхой хэмжээний дэмжлэг үзүүлий гээд сайжруулсан түлшээ 50 хувиар хямдруулж зарахаар боллоо. Ирэх жилийн Дөрвөн сарын 1-хүртэл үргэлжилнэ. Энэ их хямдхан түлш ш дээ. Өмнө нь Налайхын нүүрсийг 180-220 мянгаар авдаг байсан. Улсын үйлдвэр барисан учраас бид үнийг барьж нэг тонын 150 мянгаар тогтоосон байгаа. Энэ хөдлөхгүй хатуу үнэ. Харин цар тахлын энэ үед хямдруулж байна. Иргэд маань адгалж түлшээ хямд аваасай гэж хүсч байна. Бидний хийж чадах зүйл энэ л байна.

Мөнгө төгрөг байдагсан бол ард иргэд, үр хүүхэд, өвгөд хөгшиддөө засгийн газраас харамлах зүйл байхгүй. Харамсалтай нь бидний боломж нөхцөл хязгаарлагдмал байгаа. Сайн сайхан зүйл ярьж болно. Тэдэн сая, эдэн саяыг өг л гэнэ. Үнэндээ тийм мөнгө байхгүй. Эсвэл ард түмнээ хуурч цаасан мөнгө хэвлэх юм уу. 2012-2016 онд найман их наяд төгрөгний цаасан мөнгө хэвлэж зах зээлд гаргасан. Түүнээс болж бараа бүтээгдхүүний үнэ өссөн. Цаасан мөнгө хэвлэж гүйлгээнд гаргаж болохгүй. Энэ ард түмний амьдралыг дэмжиж тэтгээд байгаа асуудал биш маргааш нь талх, мах, цахилгаан дулааны үнэ нь овоож оцоотлоо өснө. Энэ хамгаалалт биш. Улсын эдийн засаг, ард түмнээ хорлож байгаатай адил. Тийм учраас бид бодит зүйл дээр арга хэмжээ авах нь зүйтэй" гэлээ. 

Засгийн газрын өнөөдрийн хуралдаанаар иргэд, аж ахуйн нэгжүүдийг дэмжих зорилгоор хэд хэдэн арга хэмжээ авахаар боллоо. 

Үүнд:

1. Гэр хорооллын 220 мянган өрхөд сайжруулсан шахмал түлшийг 50 хувь хямдралтай үнээр буюу 1 тн-ыг 75 мянган төгрөгөөр 2020.12.03-ны өдрөөс 2021.04.01 хүртэл худалдана. /Нийслэлчүүд өвлийн улиралд өдөрт 4,000 тн, сард 120 мянга орчим тн сайжруулсан түлш хэрэглэдэг/
2. 2021.07.01 хүртэлх хугацаанд зах, худалдааны төв болон худалдаа, үйлдвэр, үйлчилгээ, хувийн сургууль, цэцэрлэг, хүүхэд харах үйлчилгээний зориулалтаар байр, талбай түрээслүүлсэн албан татвар төлөгч түрээсийн төлбөрөө бууруулсан нь гэрээ болон төлбөрийн баримтаар нотлогдсон тохиолдолд бууруулсан хэмжээгээр түрээсийн орлогод ногдуулах аж ахуйн нэгжийн орлогын албан татварын хөнгөлөлтийг үргэлжлүүлэн эдлүүлнэ. Үүнийг УИХ-д өргөн мэдүүлнэ.
3. Хугацаандаа төлөөгүй татварын алданги, торгуулийг 2021.07.01 хүртэл чөлөөлөхтэй холбоотой хуулийн төслийг УИХ-аар хэлэлцүүлнэ.
4. "Ковид-19" цар тахлын халдварын хүрээг хумихтай холбоотойгоор халдвар гарсан зургаан аймаг болон нийслэлд гурван тэрбум төгрөгийг Засгийн газрын нөөц сангаас гаргаж тусгаарлалт, халдваргүйжүүлэлт хийнэ.
5. Халдвар гарсан аймгууд болон Гашуунсухайт, Шивээхүрэн, Цагааннуур, Эрээнцав, Замын-Үүд боомтод Засгийн газрын Ажлын хэсэг хяналт шалгалтыг эрс сайжруулах чиглэлээр ажиллаж байна гэж мэдээллээ.