Хэн хүнгүй сайн мэдэх зургийн танилцуулга Оросын Академийн 1863 оны үзэсгэлэн дээр болжээ.

Шүүмжлэгчид зургийг үнэлэн хүлээн авчээ.

Үүнд Москвагийн уран зургийн дунд сургуулийн төгсөгч Василий Пукирев баярлаж байх ёстой байв. Гэтэл түүний баяр хөөрийг сайн найз, худалдаачин Сергей Варенцовтой муудалцсан нь тасалжээ. Найз худалдаачин нь “Тэнцвэргүй гэрлэлт” зургийг харангуутаа л түүнд маш их уур хилэнг гаргажээ.

Яагаад гэвэл?

Сергей Варенцов царай зүс сайтай нэгэн ба бас их баян байсан нь эмэгтэйчүүдийн анхаарлыг бишгүй дээ татаж ирсэн нэгэн аж. Харин 30 насны өмнөхөн нь түүний зүрхийг баян фабрикийн эзний охин эзэмдлээ. Тэр бүсгүйг Софья Рыбникова гэдэг байв.

Сергей, Софья хоёрын хайрын адал явдал XIX зуунд баймааргүй хурдаар өрнөв. Залуус харц нууцаар шидэлтээс баяр наадмын танхимын булан өнцгийн шивнэлдээнд хурдан хүрлээ. Бүгд л инж сайтай бүсгүй баян худалдаачин хоёр удалгүй гэрлэнэ гэсэн гэж байлаа. Гэтэл тэдний харьцаа хурдан чимээгүй болов. Софья өөр сонголт хийжээ.

Сергей Воренцовын хамаатан бас нэг худалдаачин Воренцовын дурсамжаас: “Тэд бие биедээ дурласан байв. Гэтэл үл мэдэгдэх шалтгаанаар мадемуазель хижээл насны баян фабрикийн эзэн Карзинкинтай гэрлэсэн юм”.

Хуримын сүй тавилт Кулиш дэх  Малый Трехсвятительскийн гудамжны сүмд болжээ.

Сергей Варенцов өөрийн зовлонгоо найз зураач Василий Пукиревтай хуваалцсан байв. Харин найз нь түүнийг сэтгэл санаагаар дэмжихийн оронд бийр будгаар тэр эмгэнэлийг нь зотонд буулгасан байв.

Софьяаг хөгшин генералын сүйт болгон зураад найз Варенцовыг ард нь чимээгүй буруутгасан царайтайгаар зурсан байв. Өөрийн гомдсон царайтай зургийг үзэсгэлэн дээр харсан Варенцов найздаа уур хилэнгээ гаргажээ.

Бага зэрэг тайвширсаны дараа, Варенцов Пукиреваас зургаа өөрчлөхийг шаарджээ. Эхлээд Пукирев найзынхаа хэзээ ч ургуулж байгаагүй хуузыг зураад дараа нь царайг нь өөрчилсөн байв. Өөрийн төрхөөс оруулсан гэж ярьдаг юм билээ. Ингэж тэр зургийг засан дахин найзлах эрхтэй болжээ.

Харин Софья “тэнцвэргүй гэрлэлтээ” аз жаргалтай байсан гэх. Тэдний нас тийм хол зөрөөгүй Карзинкин дөнгөж л 38-тай байсан гэнэ. Хосууд гурван хүүхэдтэй болсон байв.

Энэ зургийн дараа Пукиревт профессор цол олгосон байв. Нэг үгээр бүгд л хожилтой байлаа. Гэхдээ хаягдсан Варенцев арай ингэж ярихгүй байсан болов уу.

М.ЦОГТ