УИХ-ын Төсвийн зарлагын хяналтын дэд хороо өнөөдөр хуралдлаа. Хуралдаан дээр тус дэд хорооны дарга, УИХ-ын гишүүн Б.Пүрэвдоржийн төсвийн зарим хөрөнгө оруулалтын талаар Сангийн сайд Ч.Хүрэлбаатарт хандаж хэлсэн үг, тоо баримт "чих дэлдийж, нүд бүлтийхээр" болсон тул энд сийрүүлэв.

Б.Пүрэвдорж:

-Төсвийн зардлыг бууруулъя гэж байгаа бол УИХ-ын сонгуульд нэр дэвшсэн хэн нэгэн хүний сонгуулийн штабт ажилласан нөхдийг шахдаг шахааны газар болсон, үр ашиггүй ажилладаг төрийн өмчийн ААН-үүдэд төсвөөс татаас өгдгөө болих хэрэгтэй. Улсын төсвөөр улстөрчийн нэр нөлөөг өсгөх, дахин сонгогдох ажлыг хийдгээ болох хэрэгтэй.

Жишээлбэл, Хэнтий аймгийн Бэрх тосгоны уурхайн газар дор таван тэрбумаар музей байгуулах төсөл хэрэгжүүлэхээр орж ирж байна. Ингэлээ гээд аялал жуулчлалд ямар нөлөөтэй вэ, нураад уначихгүй бол их юм биз дээ.

Тооцоод үзэхэд Хэнтий аймгийн нэг сумын нэг багт 37 тэрбум төгрөгийн хөрөнгө оруулалт тавьсанаас энэ жил санхүүжих нь 25 тэрбум төгрөг юм байна. Энэ бол Булган аймгийн нийт хөрөнгө оруулалтаас 3 дахин их дүн. Ч.Хүрэлбаатар сайд аа, танай Засгийн газрын хоёр гишүүн энэ суманд төрсөн байж болно. Тэглээ гээд 2000 хүнтэй багт бүхэл бүтэн бүхэл бүтэн нэг аймгаас гурав дахин илүү хөрөнгө оруулалт тавина гэдэг байж болох уу?. Үр дүн гэвэл хоёр улстөрчийн нэр нөлөөг өсгөх, дахин сонгогдох л юм байна. Улсын төсвийг ийм зүйлд зарцуулж болохгүй.

Аудитын байгууллага эрүүл мэнд, боловсрол, хилийн цэрэг, цагдаа, онцгойгоос бусад байгууллагын урсгал зардлыг 20 хувиар танах дүгнэлт гаргасан. Цар тахлын үед заавал хэрэгжүүлэх ёстой арга хэмжээ мөн. Гэтэл цар тахлын үед Хэнтий аймгийн Бэрхийн уурхайн газар дор музей байгуулах нь ямар утгатай вэ? Яг үүнтэй адилхан, ямар ч үр дүнгүй 149 төсөл, арга хэмжээ байна. Эдгээрийг царцаах юм бол 2021 оны төсвөөс 405 тэрбум төгрөгийг суллаж, энэ зардлаа жижиг, дунд үйлдвэрийн зээлд зарцуулж, ажлын байр бий болгох боломжтой.