Нийслэлийн ерөнхий боловсролын шилдэг 20 сургууль, 20 цэцэрлэгийг шалгаруулж, урамшуулал гардуулах ёслол өнөөдөр боллоо.
Үйл ажиллагаанд нийслэлийн Засаг даргын Хүний хөгжил, нийгмийн бодлого хариуцсан орлогч Н.Баярчимэг, нийслэлийн Боловсролын газрын дарга Ж.Гантулга, НЗДТГ-ын Нийгмийн бодлогын хэлтсийн дарга С.Мягмаржав, Налайх дүүргийн Засаг дарга Ч.Раднаабазар нарын холбогдох албаныхан болон сургууль, цэцэрлэгийн төлөөллүүд оролцлоо.
Нийслэлийн Засаг даргын 2016-2020 оны үйл ажиллагааны мөрийн хөтөлбөрт “Олон улсын жишигт нийцсэн боловсролын стандартад тулгуурлан сургууль, цэцэрлэгийн сургалтын чанар, үр дүнг үнэлж дүгнэх тогтолцоог боловсронгуй болгоно” гэж заасан байдаг.
Энэхүү ажлыг хэрэгжүүлэх хүрээнд нийслэлийн Засаг даргын 2019 оны захирамжаар “Нийслэлийн тэргүүний сургууль, цэцэрлэг шалгаруулах, индексийн урамшуулал олгох журам”-ыг шинэчлэн баталж, төрийн болон төрийн бус өмчийн сургууль, цэцэрлэг, бага сургууль, тусгай сургууль гэсэн ангиллаар шалгаруулж байгаагаараа онцлог юм.
Индексийн урамшуулал олгож байгаа нь сургууль, цэцэрлэгийн менежментийг сайжруулж, хүүхэд бүрд сурч, хөгжих тэгш боломжийг бүрдүүлэн боловсролын чанар, хүртээмжийг нэмэгдүүлэхэд оршиж байгаа юм.
Энэ үеэр нийслэлийн Засаг даргын Хүний хөгжил, нийгмийн бодлого хариуцсан орлогч Н.Баярчимэг “Нийслэлийн боловсролын салбарын анхны баримт бичиг болон нийслэлийн боловсрол-2020 дэд хөтөлбөрийг бид өнгөрсөн хугацаанд амжилттай хэрэгжүүлж ирлээ. Улсад боловсрол, сургалтын амжилт, чанараар 2016 онд нийслэл 12 дугаар байрт орж байсан бол 2019-2020 оны хичээлийн жилд дөрөвдүгээр байрт орсон нь хөтөлбөр амжилттай хэрэгжиж буйг харуулж байгаа юм. Ирэх жилүүдэд экологийн боловсрол олгох, байгалийн түшиц лабораториуд байгуулах, дэвшилтэд техник технологийн ололтыг монгол ахуйтай хослуулсан вертиуал сургалтын төвүүдтэй болох зэрэг олон ажлуудыг хийхээр төлөвлөж байна. Мөн боловсролд оруулах хөрөнгө оруулалтыг тасралтгүй нэмэгдүүлж, хүний хөгжил рүү чиглэсэн хүнд ээлтэй хотыг бий болгохын төлөө зорин ажиллаж байна” хэмээн онцлон хэллээ.
2017-2019 онд нийт 45 сургууль, 47 цэцэрлэгт урамшуулал олгосон бол 2020 онд 20 сургууль, 20 цэцэрлэгт урамшуулал олгож байна. Энэ үеэр нийслэлийн “Боловсролд ээлтэй Засаг дарга”-аар Налайх дүүргийн Засаг дарга Ч.Раднаабазар шалгарлаа.
Нийслэлийн шилдэг цэцэрлэг:
-
Баянзүрх дүүргийн 146 дугаар цэцэрлэг
-
Баянгол дүүргийн 11 дүгээр цэцэрлэг
-
Хан-Уул дүүргийн 189 дүгээр цэцэрлэг
-
Хан-Уул дүүргийн 53 дугаар цэцэрлэг
-
Сонгиохайрхан дүүргийн 101 дүгээр цэцэрлэг
-
Баянгол дүүргийн 242 дугаар цэцэрлэг
-
Баянзүрх дүүргийн 147 дугаар цэцэрлэг
-
Сонгинохайрхан дүүргийн 55 дугаар цэцэрлэг
-
Баянгол дүүргийн 114 дүгээр цэцэрлэг
-
Баянзүрх дүүргийн 61 дүгээр цэцэрлэг
-
Чингэлтэй дүүргийн 103 дугаар цэцэрлэг
-
Сүхбаатар дүүргийн 75 дугаар цэцэрлэг
-
Чингэлтэй дүүргийн 5 дугаар цэцэрлэг
-
Баянгол дүүргийн 98 дугаар цэцэрлэг
-
Сүхбаатар дүүргийн 186 дугаар цэцэрлэг
-
Баянзүрх дүүргийн 204 дүгээр цэцэрлэг
-
Сонгинохайрхан дүүргийн 158 дугаар цэцэрлэг
-
Сонгинохайрхан дүүргийн 91 дүгээр цэцэрлэг
-
Налайх дүүргийн 208 дугаар цэцэрлэг
-
Сүхбаатар дүүргийн 225 дугаар цэцэрлэг
Нийслэлийн шилдэг сургууль:
-
Сүхбаатар дүүргийн 3 дугаар сургууль
-
Баянзүрх дүүргийн 84 дүгээр сургууль
-
Сүхбаатар дүүргийн 11 дүгээр сургууль
-
Хан-Уул дүүргийн 63 дугаар сургууль
-
Сүхбаатар дүүргийн “Эрдмийн хөтөч” цогцолбор сургууль
-
Сонгинохайрхан дүүргийн 129 дүгээр бага сургууль
-
Баянзүрх дүүргийн 48 дугаар сургууль
-
Налайх дүүргийн 103 дугаар сургууль
-
Сүхбаатар дүүргийн 131 дүгээр сургууль
-
Сонгинохайрхан дүүргийн 67 дугаар сургууль
-
Сонгинохайрхан дүүргийн 122 дугаар сургууль
-
Багануур дүүргийн “Боловсрол” цогцолбор сургууль
-
Баянгол дүүргийн 113 дугаар сургууль
-
Сонгинохайрхан дүүргийн 104 дүгээр сургууль
-
Хан-Уул дүүргийн 135 дугаар сургууль
-
Чингэлтэй дүүргийн 49 дүгээр сургууль
-
Чингэлтэй дүүргийн 50 дугаар сургууль
-
Сүхбаатар дүүргийн 45 дугаар сургууль
-
Хан-Уул дүүргийн “Орхон Хасү” сургууль
-
Сүхбаатар дүүргийн 139 дүгээр бага сургууль
